میں اسپتال کے بستر پہ تم سے اتنی دور

نہ جانے آج کے دن کیا نہیں ہوا ہو گا

کسی کے ہات میں مہتاب آ گیا ہو گا

کسی کی بزم میں خورشید ناچتا ہو گا

کسی کو دل کی کشاکش کا حوصلہ ہو گا

نہ جانے کتنے خیالوں کا دل بڑھا ہو گا

پہاڑ ہوں گے سمندر کا راستہ ہو گا

یہ اسپتال کے آنسو یہ اسپتال کی ریت

پکارتی ہوئی آنکھیں کراہتے ہوئے دل

یہ اپنی زیست کا احساس کیسی نعمت ہے

جو مل گئی بھی تو کتنی ذرا سی بات ملی

کسی کے قدموں میں سورج کا سر جھکا بھی تو کیا

مرے وجود کی گہری خموش ویرانی

تمہیں تو صرف مقدر سے چاند رات ملی