امام بخش ناسخ

ناسخؔ کی یہ التجا ہے یا رب
مر جاؤں تو خاک کربلا ہوں
زمانے کے ستم سے روز ناسخؔ
نئی اک کربلا ہے اور میں ہوں

میر انیس

انیسؔ بیچ کے جاں اپنی ہند سے نکلو
جو توشۂ سفر کربلا نہیں رکھتے
تو سراپا اجر اے زاہد میں سر تا پا گناہ
باغ جنت تیری خاطر کربلا میرے لیے
خاک سے ہے خاک کو الفت تڑپتا ہوں انیسؔ
کربلا کے واسطے میں کربلا میرے لیے

یگانہ چنگیزی

وطن کو چھوڑ کر جس سر زمیں کو میں نے عزت دی
وہی اب خون کی پیاسی ہوئی ہے کربلا ہو کر

عرفان صدیقی

تو کیا خراب ہی کی جائے یہ خدا کی زمیں
تو کیا دمشق کے جادے میں کربلا بھی نہ آئے

ادا جعفری

ہر آرزو کا نام نہیں آبروئے جاں
ہر تشنہ لب جمال رخ کربلا نہ تھا

عبید اللہ علیم

جو شام آئی تو پھر شام کا لگا دربار
جو دن ہوا تو وہ دن کربلا سا لگتا ہے
زمین جب بھی ہوئی کربلا ہمارے لیے
تو آسمان سے اترا خدا ہمارے لیے

جوش ملیح آبادی

سنتے بھی ہیں جو لوگ تو یوں داستان غم
جیسے یزید سانحۂ کربلا سنے

افضل منہاس

میں بوند بوند ٹپکتا ہوں اپنے ہونٹوں پر
چلا تھا لے کے یہ سرمایہ کربلا کے لیے

احمد فراز

کل جب تھمے گی خون کی بارش تو سوچنا
تم تھے عدو کی صف میں سرِ کربلا کہ میں