افضل منہاس

لوگ ہنسنے کے لیے روتے ہیں اکثر دہر میں
تلخیاں خود ہی ملا لیتے ہیں میٹھے زہر میں
چند آوازیں تعاقب میں ہیں افضلؔ آج بھی
قربتوں کا شہد ہے تنہائیوں کے زہر میں

محسن احسان

سر پہ تیغ بے اماں ہاتھوں میں پیالہ زہر کا
کس طرح ہونٹوں پہ لاؤں حال اپنے شہر کا
دشمنی کی مے تو چھلکی ہے بہت محسنؔ مگر
ذائقہ کچھ اور ہی ہے دوستی کے زہر کا

ناصر کاظمی

اڑ گئے شاخوں سے یہ کہہ کر طیور
اس گلستاں کی ہوا میں زہر ہے