امام بخش ناسخ

یاد گیسو میں ہوا میرا یہ دھجی سا بدن
مجھ پہ پھبتی کہتے ہیں موباف ہے گیسو نہیں
ہو گیا ہے مثل مو تارِ نگہ اپنا سیاہ
آگے آنکھوں کے صنم جب سے ترے گیسو نہیں

انشاء اللہ خان انشا

میاں چشم جادو پہ اتنا گھمنڈ
خط و خال و گیسو پہ اتنا گھمنڈ

شیخ ابراہیم ذوق

خط بڑھا کاکل بڑھے زلفیں بڑھیں گیسو بڑھے
حسن کی سرکار میں جتنے بڑھے ہندو بڑھے

مصحفی غلام ہمدانی

یوں دل کو گرفتار رکھوں صید الم میں
پر اور کا صید خم گیسو نہ کروں میں

مصطفی زیدی

مژدہ اے دل کسی پہلو تو قرار آ ہی گیا
منزل دار کٹی ساعت گیسو آئی

بیخود بدایونی

کہئے تو کس کے پھنسانے کی یہ تدبیریں ہیں
آج کیوں چیں بہ جبیں سے خم گیسو بدلا

ضیا جالندھری

ہم تری یاد سے کترا کے گزر جاتے مگر
راہ میں پھولوں کے لب سایوں کے گیسو آئے

عبید اللہ علیم

نیند آنکھوں سے اڑی پھول سے خوشبو کی طرح
جی بہل جائے گا شب سے ترے گیسو کی طرح
میری آشفتگی شوق میں اک حسن بھی ہے
تیرے عارض پہ مچلتے ہوئے گیسو کی طرح