امام بخش ناسخ

دیکھے ہیں ہنسنے میں جس دن سے در دندان یار
چین مثل گوہرِ غلطاں کسی پہلو نہیں

مصحفی غلام ہمدانی

ہم خوابہ اگر ہووے مری حور بہشتی
ایدھر سے ادھر کو کبھی پہلو نہ کروں میں

باقی صدیقی

زیست پر میں ہوں گراں یا تو ہے
تشنۂ شوق ہر اک پہلو ہے

جون ایلیا

خوب ہے شوق کا یہ پہلو بھی
میں بھی برباد ہو گیا تو بھی

عرفان صدیقی

ہم کبھی دھیان سے اس کے نہ اترنے پائیں
دائم آباد رہے حسن کا پہلو ہم سے

مصطفیٰ زیدی

جب ہوا شب کو بدلتی ہوئی پہلو آئی
مدتوں اپنے بدن سے تری خوشبو آئی

بیخود بدایونی

شکوہ سن کر جو مزاج بت بد خو بدلا
ہم نے بھی ساتھ ہی تقریر کا پہلو بدلا
دل مضطر کی تڑپ سے جو میں تڑپا بیخودؔ
چارہ گر خوش ہیں کہ بیمار نے پہلو بدلا

شاد عظیم آبادی

جس کو سمجھے ہو وہی چیز نہیں مدت سے
ہم دکھا دیں گے کبھی چیر کے پہلو اپنا

شان الحق حقی

اس کی بزمِ ناز سے دور
اس کے ہم پہلو بھی میں

احمد فراز

بیٹھے تھے لوگ پہلو بہ پہلو پیے ہوئے
اک ہم تھے تیری بزم میں آنسو پیے ہوئے

اقبال ساجد

رخِ روشن کا روشن ایک پہلو بھی نہیں نکلا
جسے میں چاند سمجھا تھا وہ جگنو بھی نہیں نکلا

قیوم نظر

سینۂ سنگ پر ٹھٹھرتا ہوا
شاخِ گل کا گداز پہلو ہے

ناصر کاظمی

یاس میں جب کبھی آنسو نکلا
اک نئی آس کا پہلو نکلا
لے اڑی سبزۂ خود رو کی مہک
پھر تری یاد کا پہلو نکلا