بہادر شاہ ظفر

خاکساری کے لیے گرچہ بنایا تھا مجھے
کاش خاکِ در جانانہ بنایا ہوتا

حیدر علی آتش

شرح لکھا چاہیے اس کی بیاض صبح پر
مطلع خورشید بیت ابرو جانانہ ہے
صید گاہ مرغِ دل رخسارۂِ جانانہ ہے
دام زلف عنبریں ہے خال مشکیں دانہ ہے

احسان دانش

آ چکا ہو گا سرِ طور وفا موسیٰ کو ہوش
اب تجھے تکلیف دیں گے جلوۂ جانانہ ہم
کعبہ و دیر کلیسا میں عبث ڈھونڈا کیے
دل کا ہر گوشہ مقام جلوۂ جانانہ تھا
خامی ذوقِ نظر تھی ورنہ اے ناکام عشق
ذرے ذرے سے نمایاں جلوۂ جانانہ تھا

اختر شیرانی

دل میں خیال نرگس جانانہ آ گیا
پھولوں سے کھیلتا ہوا دیوانہ آ گیا
کھیل امید کے دیکھو کہ نہ کی ان کو خبر
پھر بھی ہم منتظر جلوۂ جانانہ چلے

بہزاد لکھنوی

بہزادؔ ہر اک گام پہ اک سجدۂ مستی
ہر ذرے کو سنگِ در جانانہ بنا دے

علی سردار جعفری

عشق پہلو میں ہے پھر جلوۂ جانانہ لیے
زلف اک ہاتھ میں اک ہاتھ میں پیمانہ لیے

جلیل مانک پوری

آنکھوں کو چھوڑ جاؤں الٰہی میں کیا کروں
ہٹتی نہیں نظر رخِ جانانہ چھوڑ کر

جوش ملیح آبادی

آؤ اے زمزہ سنجان سرا پردۂ گل
بہ ہوائے نفس تازۂ جانانہ چلیں

شکیل بدایونی

لذت کش نظارہ شکیلؔ اپنی نظر ہے
محرومِ جمال رخِ جانانہ نہیں ہوں

کلیم عاجز

غمِ دل ہی غمِ دوراں غم جانانہ بنتا ہے
یہی غم شعر بنتا ہے یہی افسانہ بنتا ہے
اسی سے گرمی دار و رسن ہے انقلابوں میں
بہاروں میں یہی زلف و قد جانانہ بنتا ہے
نظر کو آئنہ دل کو ترا شانہ بنا دیں گے
تجھے ہم کیا سے کیا اے زلف جانانہ بنا دیں گے

مجروح سلطان پوری

اہلِ طوفاں آؤ دل والوں کا افسانہ کہیں
موج کو گیسو بھنور کو چشم جانانہ کہیں
آرزو ہی رہ گئی مجروحؔ کہتے ہم کبھی
اک غزل ایسی جسے تصویر جانانہ کہیں