حیدر علی آتش

کمر یار کے مضمون کو باندھو آتشؔ
زلف خوباں سی رسا تم کو طبیعت دی ہے

داغ دہلوی

بن سنور کر جو وہ آئے تو یہ میں جان گیا
اب گئی جان گئی آئی طبیعت آئی
میں ہوا شیفتہ ان پر وہ عدو پر شیدا
ساتھ کے ساتھ ہی دونوں کی طبیعت آئی
موت مجھ کو دکھائی دیتی ہے
جب طبیعت کو دیکھتا ہوں میں
کچھ لاگ کچھ لگاو محبت میں چاہیے
دونوں طرح کا رنگِ طبیعت میں چاہیے
معشوق کے کہے کا برا مانتے ہو داغؔ
برداشت آدمی کی طبیعت میں چاہیے

جلیل مانک پوری

میں یہ سمجھوں کوئی معشوق مرے ہاتھ آیا
میرے قابو میں جو آ جائے طبیعت میری
بوئے گیسو نے شگوفہ یہ نیا چھوڑا ہے
نکہتِ گل سے الجھتی ہے طبیعت میری

جوش ملیح آبادی

عیش کی جانب جو مائل کچھ طبیعت ہو گئی
دل پہ غصہ آ گیا اپنے سے نفرت ہو گئی
مجھ کو خود اپنی تباہی پر ترس آتا نہیں
خوگر غم اس قدر اب تو طبیعت ہو گئی

حسرت موہانی

ہے مشقِ سخن جاری چکی کی مشقت بھی
اک طرفہ تماشا ہے حسرتؔ کی طبیعت بھی

سیماب اکبر آبادی

میں خود ترکِ تعلق پر ہوں مجبور
کچھ ایسی ہی طبیعت ہو رہی ہے

شکیل بدایونی

شکیلؔ ان کی جدائی میں ہے لطف زندگی زائل
نظر بے کیف افسردہ طبیعت ہوتی جاتی ہے

اقبال ساجد

اس آئنے میں دیکھنا حیرت بھی آئے گی
اک روز مجھ پہ اس کی طبیعت بھی آئے گی

فراق گورکھپوری

بیتابی و سکوں کی ہوئیں منزلیں تمام
بہلائیں تجھ سے چھٹ کے طبیعت کہاں کہاں
حسن والوں کو بہت سہل سمجھ رکھا تھا
تجھ پہ آئے گی طبیعت مجھے معلوم نہ تھا

ناصر کاظمی

ہوتی ہے تیرے نام سے وحشت کبھی کبھی
برہم ہوئی ہے یوں بھی طبیعت کبھی کبھی