حیدر علی آتش

جگر کو داغ میں مانند لالہ کیا کرتا
لبالب اپنے لہو کا پیالہ کیا کرتا
ملا نہ سرو کو کچھ اپنی راستی میں پھل
کلاہ کج جو نہ کرتا تو لالہ کیا کرتا

سراج الدین ظفر

برس پڑے جو گلستاں میں اس نظر سے شراب
بہک بہک کے ہم آگے سبوئے لالہ کریں
دکھا صحیفۂ رخ اس طرح کہ اہل بہار
ورق ورق بہ خجالت بیاض لالہ کریں

مجید امجد

چمن چمن میں بہ طغیان رنگِ لالہ پھرو
ختن ختن میں بہ انبوہِ صد غزالہ پھرو
روش روش پہ بچھی ہے سیاہیوں کی بساط
پلک پلک پہ جلا کرچراغِ لالہ پھرو