داغ دہلوی

گرچہ از حد ہوں گنہ گار مسلمان تو ہوں
پیچھے پیچھے مرے دوزخ میں بھی جنت آئی
یہ رنج و عیش ہوئے ہجر و وصل میں ہم کو
کہاں ہے دوزخ و جنت کسی کو کیا معلوم

شیخ ابراہیم ذوق

گئے جنت میں اگر سوزِ محبت والے
تو یہ جانو رہے دوزخ ہی میں جنت والے
کب حق پرست زاہد جنت پرست ہے
حوروں پہ مر رہا ہے یہ شہوت پرست ہے

قمر جلالوی

اب وہ عالم ہے مرا اس بزمِ عشرت کے بغیر
حال تھا جو حضرتِ آدم کا جنت کے بغیر

بیان میرٹھی

کہاں لے جائے گا یا رب سمند تند وحشت کا
کہ پیچھے رہ گیا کوسوں دوراہا نار و جنت کا

شکیل بدایونی

نورِ سحر ہے جان تصور ظلمتِ شب سے کون ڈرے
لاکھ بنی ہے زیست جہنم سامنے جنت آج بھی ہے
گلشن ہو نگاہوں میں تو جنت نہ سمجھنا
دم بھر کی عنایت کو محبت نہ سمجھنا

فانی بدایونی

اپنی جنت مجھے دکھلا نہ سکا تو واعظ
کوچۂ یار میں چل دیکھ لے جنت میری

شاذ تمکنت

در و دیوار پر بس ایک سناٹے کی رونق ہے
مرے مہماں سے پوچھو گھر کی جنت ایسی ہوتی ہے