داغ دہلوی

ترک رسم و راہ پر افسوس ہے دونوں طرف
ہم سے نادانی ہوئی یا تم سے نادانی ہوئی

مصحفی غلام ہمدانی

کافر دل جلاد نہیں ہم زخم کو ایک سمجھتے ہیں
ہم کو جو اس کام کا سمجھے اس کی یہ نادانی ہے
چشم نے کی گوہر افشانی صریح
ہو گئی یہ ہم سے نادانی صریح

فیض احمد فیض

کس شہر نہ شہرہ ہوا نادانی دل کا
کس پر نہ کھلا راز پریشانی دل کا

جگر مراد آبادی

جلے جاتے ہیں بڑھ بڑھ کر مٹے جاتے ہیں گر گر کر
حضور شمع پروانوں کی نادانی نہیں جاتی

عبدالحمید عدم

عقل سے کیا کام مجھ ناچیز کا
ایک معمولی سی نادانی ہوں میں
مجھ کو پچھتانا نہیں آتا عدمؔ
ایک دولت مند نادانی ہوں میں

قمر جلالوی

خدائی کی ہے یہ ضد اے بت یہ نادانی نہیں جاتی
زبردستی کی منوائی ہوئی مانی نہیں جاتی

مصطفی زیدی

اس طرح ہوش گنوانا بھی کوئی بات نہیں
اور یوں ہوش سے رہنے میں بھی نادانی ہے

جمال احسانی

میں ابھی پہلے خسارے سے نہیں نکلا ہوں
پھر بھی تیار ہے دل دوسری نادانی پر
راہ میں سارے چراغ اسی کے دم سے روشن ہیں
جو پیماں ہوا سے باندھا تھا نادانی میں

اکبر معصوم

مجھ کو تو وہ بھی ہے معلوم جو معلوم نہیں
یہ سمجھ بوجھ نہیں ہے مری نادانی ہے

عبید اللہ علیم

دل کہتا ہے وہ کچھ بھی ہو اس کی یاد جگائے رکھ
عقل یہ کہتی ہے کہ توہم پر جینا نادانی ہے
صرف گفتار سے زخموں کا رفو چاہتے ہیں
یہ سیاست ہے تو پھر کیا کہیں نادانی کو