داغ دہلوی

ہم ایسے محو نظارہ نہ تھے جو ہوش آتا
مگر تمہارے تغافل نے ہوشیار کیا
ہو جو اس چشمِ مست سے بے خود
پھر اسے ہوشیار کون کرے
شرم سمجھے ترے تغافل کو
واہ کیا ہوشیار ہم بھی ہیں
لے ہی تو لے گی دل نگاہ تری
ہر طرح ہوشیار ہم بھی ہیں

شیخ ابراہیم ذوق

اے ذوقؔ ہوش گر ہے تو دنیا سے دور بھاگ
اس مے کدے میں کام نہیں ہوشیار کا

احسان دانش

چھڑا چکا ہوں میں دست مجاز سے دامن
حقیقت اپنے حجابوں سے ہوشیار رہے

جلیل مانک پوری

کچھ ایسی آج پلائی ہے چشمِ ساقی نے
نہ ہوش ہے نہ کوئی ہوشیار باقی ہے

حفیظ جالندھری

اللہ بات کیا ہے کہ دیوانگی مری
دیوانگی نہیں نظر ہوشیار میں

سید ضمیر جعفری

جنوں پہ جبر خرد جب بھی ہوشیار ہوا
نظر کے ساتھ نظارہ بھی شرم سار ہوا

فراق گورکھپوری

کون ترغیب ہوش دے کہ جنوں
بے خبر بھی ہے ہوشیار بھی ہے

قیوم نظر

اب آخرِ شب نظرؔ ہے شاید
پھر جیسے ہیں ہوشیار سے ہم

کلیم عاجز

کسی سے پیار نہیں پھر بھی پیار ہے سب سے
وہ مست حسن ہے کیا ہوشیار دیکھو تو