مصحفی غلام ہمدانی

معمورۂِ دل اپنا ویران رہا برسوں
وہ کون سی بستی ہے کیا جانے جو بستی ہے

یگانہ چنگیزی

کارگاہ دنیا کی نیستی بھی ہستی ہے
اک طرف اجڑتی ہے ایک سمت بستی ہے

شکیب جلالی

یہ آدمی ہیں کہ سائے ہیں آدمیت کے
گزر ہوا ہے مرا کس اجاڑ بستی میں!

جلیل مانک پوری

تری آنکھوں کے صدقے ایک دنیا ان میں بستی ہے
فسوں ہے سحر ہے اعجاز ہے شوخی ہے مستی ہے
تباہی دل میں رہتی ہے خرابی دل میں بستی ہے
یہی آباد بستی ہے یہی ویران بستی ہے
فراق روح کیوں کر ہو گوارا جسم انساں کو
اجڑ کر پھر نہیں آباد ہوتی یہ وہ بستی ہے
دلِ عاشق میں حسرت بھی ہے ارماں بھی تمنا بھی
وہ جس بستی میں رہتے ہیں بڑی آباد بستی ہے

سیف الدین سیف

دلِ ویراں کو دیکھتے کیا ہو
یہ وہی آرزو کی بستی ہے

فانی بدایونی

آبادی بھی دیکھی ہے ویرانے بھی دیکھے ہیں
جو اجڑے اور پھر نہ بسے دل وہ نرالی بستی ہے
جگ سونا ہے تیرے بغیر آنکھوں کا کیا حال ہوا
جب بھی دنیا بستی تھی اب بھی دنیا بستی ہے
دل کا اجڑنا سہل سہی بسنا سہل نہیں ظالم
بستی بسنا کھیل نہیں بستے بستے بستی ہے

امیر مینائی

سر راہِ عدم گورِ غریباں طرفہ بستی ہے
کہیں غربت برستی ہے کہیں حسرت برستی ہے
خمارِ نشہ سے نگاہیں ان کی کہتی ہیں
یہاں کیا کام تیرا، یہ تو متوالوں کی بستی ہے