مرزا غالب

یوں ہی دکھ کسی کو دینا نہیں خوب ورنہ کہتا
کہ مرے عدو کو یا رب ملے میری زندگانی
رخِ نگار سے ہے سوزِ جاودانیِ شمع
ہوئی ہے آتشِ گل آب زندگانی شمع
جنوں تہمت کشِ تسکیں نہ ہو گر شادمانی کی
نمک پاشِ خراشِ دل ہے لذت زندگانی کی
کوئی دن گر زندگانی اور ہے
اپنے جی میں ہم نے ٹھانی اور ہے

حیدر علی آتش

لب جاں بخش کے قریب وہ خط
شرح ہے متن زندگانی کی
راحتِ مرگ کو نہ پوچھ آتشؔ
نہ رہی قدر زندگانی کی
کھلا سودے میں ان زلفوں کے مر کر
پریشاں خواب تھی یہ زندگانی
موے جو پیشتر مرنے سے وہ لوگ
کفن سمجھے قبائے زندگانی

اختر شیرانی

ہے زمانہ عشق سلمیٰ میں گنوا دے زندگی
یہ زمانہ پھر کہاں یہ زندگانی پھر کہاں

بہزاد لکھنوی

ترے عشق میں زندگانی لٹا دی
عجب کھیل کھیلا جوانی لٹا دی
تمہارے ہی کارن تمہاری بدولت
تمہاری قسم زندگانی لٹا دی

عبید اللہ علیم

کوئی عزیز نہیں ما سوائے ذات ہمیں
اگر ہوا ہے تو یوں جیسے زندگانی ہوئی

جلیل مانک پوری

بہاریں لٹا دیں جوانی لٹا دی
تمہارے لیے زندگانی لٹا دی

جوش ملیح آبادی

دل ملا ہے جنہیں ہمارا سا
تلخ ان سب کی زندگانی ہے

فانی بدایونی

مآل سوزِ غم ہائے نہانی دیکھتے جاؤٔ
بھڑک اٹھی ہے شمع زندگانی دیکھتے جاؤٔ

اقبال ساجد

جس سے روشن تھا مقدر وہ ستارہ کھو گیا
ظلمتوں کی نذر آخر زندگانی ہو گئی
چلۂ جاں پر چڑھا کر آخری سانسوں کے تیر
موت کی سرحد میں داخل زندگانی ہو گئی

فراق گورکھپوری

ایک پیغام زندگانی بھی
عاشقی مرگِ ناگہانی بھی