باقی صدیقی

خبر کچھ ایسی اڑائی کسی نے گاؤں میں
اداس پھرتے ہیں ہم بیریوں کی چھاؤں میں

شکیب جلالی

میٹھے چشموں سے ‘ خنک چھاؤں سے دور
زخم کھلتے ہیں ترے گاؤں سے دور

جمال احسانی

ڈار سے بچھڑا ہوا کبوتر شاخ سے ٹوٹا ہوا گلاب
آدھا دھوپ کا سرمایہ ہے آدھی دولت چھاؤں کی

رئیس فروغؔ

دھوپ میں ہم ہیں کبھی ہم چھاؤں میں
راستے الجھے ہوئے ہیں پاؤں میں
ہم نے اپنایا درختوں کا چلن
خود کبھی بیٹھے نہ اپنی چھاؤں میں

فارغ بخاری

دو گھڑی بیٹھے تھے زلف عنبریں کی چھاؤں میں
چبھ گیا کانٹا دلِ حسرت زدہ کے پاؤں میں
جلتے موسم میں کوئی فارغ نظر آتا نہیں
ڈوبتا جاتا ہے ہر اک پیڑ اپنی چھاؤں میں
بیگانگی سے مجھ کو نہ یوں دیکھیے کہ میں
حصہ ہوں آپ ہی کے دریچے کی چھاؤں کا

ماجد صدیقی

ان سے نسبت ہمیں ہے یوں ماجدؔ
ربط جیسے ہو دھوپ چھاؤں کا

خاطر غزنوی

یادوں کے نقش کندہ ہیں ناموں کے روپ میں
ہم نے بھی دن گزارے درختوں کی چھاؤں میں
ایک ایک کر کے لوگ نکل آئے دھوپ میں
جلنے لگے تھے جیسے سبھی گھر کی چھاؤں میں

قتیل شفائی

اے مرے ہم سفرو تم بھی تھکے ہارے ہو
دھوپ کی تم تو ملاوٹ نہ کرو چھاؤں میں
اگلے گا آفتاب کچھ ایسی بلا کی دھوپ
رہ جائیں گے زمین پہ کچھ داغ چھاؤں کے
گاتے ہوئے پیڑوں کی خنک چھاؤں سے آگے نکل آئے
ہم دھوپ میں جلنے کو ترے گاؤں سے آگے نکل آئے