باقی صدیقی

ہر ایک سمت سے اڑ اڑ کے ریت آتی ہے
ابھی ہے زور وہی دشت کی ہواؤں میں

الطاف حسین حالی

اس کے کوچہ میں ہیں وہ بے پر و بال
اڑتے پھرتے ہیں جو ہواؤں پر

بشیر بدر

خوشبو کی طرح آیا وہ تیز ہواؤں میں
مانگا تھا جسے ہم نے دن رات دعاؤں میں
پتہ تو آخر پتہ تھا گنجان گھنے درختوں نے
زمیں کو تنہا چھوڑ دیا ہے اتنی تیز ہواؤں میں
کھڑے ہوئے جو ساحل پر تو دل میں پلکیں بھیگ گئیں
شاید آنسو چھپے ہوئے ہوں صبح کی نرم ہواؤں میں

فارغ بخاری

دیتا ہے کون دل کے کواڑوں پہ دستکیں
یہ کون روپ دھار کے آیا ہواؤں کا

ماجد صدیقی

حسن اور مقتضی جفاؤں کا
پھر گیا رخ کدھر ہواؤں کا

سلام مچھلی شہری

کسی چمن کسی گل پیرہن کے گھر جائیں
مجھی کو تاک لیا مدھ بھری ہواؤں نے

قتیل شفائی

منظر سمیٹ لائے ہیں جو تیرے گاؤں کے
نیندیں چرا رہے ہیں وہ جھونکے ہواؤں کے

محسن نقوی

اب وہ طوفاں ہے نہ وہ شور ہواؤں جیسا
دل کا عالم ہے ترے بعد خلاؤں جیسا
پھر تری یاد کے موسم نے جگائے محشر
پھر مرے دل میں اٹھا شور ہواؤں جیسا