میر انیس

شمع کے رونے پہ بس صاف ہنسی آتی ہے
آتشِ دل کہیں کم ہوتی ہے چار آنسو سے

باقی صدیقی

جانے کب دیدۂ تر تک پہنچے
دل بھی اک جلتا ہوا آنسو ہے

اکبر معصوم

جس کے بغیر جی نہیں سکتے تھے جا چکا
پر دل سے درد آنکھ سے آنسو کہاں گیا

بشیر بدر

میری آنکھوں میں ترے پیار کا آنسو آئے
کوئی خوشبو میں لگاؤں تری خوشبو آئے
اس نے چھو کر مجھے پتھر سے پھر انسان کیا
مدتوں بعد مری آنکھوں میں آنسو آئے

ضیا جالندھری

آزمائش کی گھڑی سے گزر آئے تو ضیاؔ
جشن غم جاری ہوا آنکھوں میں آنسو آئے

عبید اللہ علیم

دوستو جشن مناؤ کہ بہار آئی ہے
پھول گرتے ہیں ہر اک شاخ سے آنسو کی طرح
اب ترے ہجر میں لذت نہ ترے وصل میں لطف
ان دنوں زیست ہے ٹھہرے ہوئے آنسو کی طرح

شاد عظیم آبادی

للہ الحمد کدورت نہیں رہنے پاتی
منہ دھلا دیتا ہے ہر صبح کو آنسو اپنا
شادؔ سمجھاتے ہیں کیوں غیر لیا کیا ان کا
چشمِ تر اپنی ہے جان اپنی ہے آنسو اپنا

شان الحق حقی

شامل مے پیمانہ بھر
پیتا ہوں آنسو بھی میں

احمد فراز

جب تری یاد کے جگنو چمکے
دیر تک آنکھ میں آنسو چمکے
ہم نے دیکھا سرِ بازار وفا
کبھی موتی کبھی آنسو چمکے
بیٹھے تھے لوگ پہلو بہ پہلو پیے ہوئے
اک ہم تھے تیری بزم میں آنسو پیے ہوئے

قیوم نظر

شدت کرب سے نڈھال نہیں
آنکھ میں جم گیا جو آنسو ہے

ناصر کاظمی

یاس میں جب کبھی آنسو نکلا
اک نئی آس کا پہلو نکلا
واقعہ یہ ہے کہ بدنام ہوئے
بات اتنی تھی کہ آنسو نکلا