باقی صدیقی

رہبر کا طلسم جب ٹوٹا
یاد ایک ایک ہم سفر آیا

بشیر بدر

انمول موتی پیار کے دنیا چرا کر لے گئی
دل کی حویلی کا کوئی دروازہ تھا ٹوٹا ہوا

افضل منہاس

شاخوں سے ٹوٹنے کی صدا دور تک گئی
محسوس ہو رہا ہے کہ ٹوٹا ہوا ہوں میں

فراق گورکھپوری

لب اعجاز کی سوگند یہ جھنکار تھی کیا
تیری خاموشی کے مانند ابھی کچھ ٹوٹا ہے

کلیم عاجز

میرے وہ دوست مجھے دادِ سخن کیا دیں گے
جن کے دل کا کوئی حصہ ذرا ٹوٹا بھی نہیں

محسن احسان

دلوں میں ایک ربط باہمی ہے
ابھی یہ سلسلہ ٹوٹا کہاں ہے

ناصر کاظمی

بھولی نہیں اس رات کی دہشت
چرخ پہ جب تارا ٹوٹا تھا
شام تو جیسے خواب میں گزری
آدھی رات نشہ ٹوٹا تھا