شکیب جلالی

تو نے کیا کیا نہ اے زندگی!دشت و در میں پھرایا مجھے
اب تو اپنے در و بام بھی‘ جانتے ہیں پرایا مجھے

رئیس فروغؔ

آنکھیں جو بے حال ہوئی ہیں
دیکھ لیا تھا خواب پرایا

آنس معین

وہ میرے حال پہ رویا بھی مسکرایا بھی
عجیب شخص ہے اپنا بھی ہے پرایا بھی

بشیر بدر

وہ چاندنی کا بدن خوشبوؤں کا سایا ہے
بہت عزیز ہمیں ہے مگر پرایا ہے

زہرا نگاہ

ہر جذبۂ معصوم کی لگ جاتی ہے بولی
کہنے کو خریدار پرایا نہیں ہوتا

عبید اللہ علیم

کاش دیکھو کبھی ٹوٹے ہوئے آئینوں کو
دلِ شکستہ ہو تو پھر اپنا پرایا کیا ہے

فارغ بخاری

کہاں سے لاؤں وہ دل جو ترا برا چاہے
عدوئے جاں ترا دکھ بھی کوئی پرایا نہیں

شاذ تمکنت

آؤ کہ دیکھ آئیں فراموشیوں کا شہر
ممکن ہے کوئی اپنا پرایا دکھائی دے

کیف بھوپالی

اس گلستاں کی یہی ریت ہے اے شاخِ گل
تو نے جس پھول کو پالا وہ پرایا ہو گا

کیفی اعظمی

بجلی کے تار پہ بیٹھا ہوا ہنستا پنچھی
سوچتا ہے کہ وہ جنگل تو پرایا ہو گا

میرا جی

نگری نگری پھرا مسافر گھر کا رستا بھول گیا
کیا ہے تیرا کیا ہے میرا اپنا پرایا بھول گیا