احسان دانش

اب کہو کارواں کدھر کو چلے
راستے کھو گئے چراغ جلے
ہم پہ گزری ہیں ہجر کی راتیں
ہم جہنم میں تھے مگر نہ جلے

احمد راہی

ارمانوں کے نرم شگوفے
شاخوں کے ہمراہ جلے ہیں

اکبر حمیدی

بڑا ہی خوشیوں بھرا ہنستا بستا گھر ہے مرا
اسی لیے تو سبھی قمقمے جلے ہوئے ہیں

قابل اجمیری

دن چھپا اور غم کے سائے ڈھلے
آرزو کے نئے چراغ جلے
کون یاد آ گیا اذاں کے وقت
بجھتا جاتا ہے دل چراغ جلے

کلیم عاجز

کس طرح کوئی دھوپ میں پگھلے ہے جلے ہے
یہ بات وہ کیا جانے جو سائے میں پلے ہے
دل درد کی بھٹی میں کئی بار جلے ہے
تب ایک غزل حسن کے سانچے میں ڈھلے ہے
کیا دل ہے کہ اک سانس بھی آرام نہ لے ہے
محفل سے جو نکلے ہے تو خلوت میں جلے ہے