اختر شیرانی

آپ ہی نے دردِ دل بخشا ہمیں
آپ ہی اس کا مداوا کیجیے

ظہیر کاشمیری

معصوم ستم گر کی باتیں مظلوم ادا کے افسانے
یوں رات بسر ہو جاتی ہے یوں دل کا مداوا کرتے ہیں

عبید اللہ علیم

دنیا میں کھپائے سال کئی آخر میں کھلا احوال یہی
وہ گھر کا ہو یا باہر کا ہر دکھ کا مداوا گھر میں ہے

شکیل بدایونی

ہر چند دردِ عشق کا درماں نہیں مگر
بنتی نہیں ہے فکر مداوا کیے بغیر

اکبر حمیدی

کتنا مان گمان ہے دینے والے کو
درد دیا ہے اور مداوا روک لیا

ناصر کاظمی

خیالِ ترکِ تمنا نہ کر سکے تو بھی
اداسیوں کا مداوا نہ کر سکے تو بھی
تجھے یہ غم کہ مری زندگی کا کیا ہو گا
مجھے یہ ضد کہ مداوا نہ کر سکے تو بھی