مرزا غالب

لیتا نہیں مرے دلِ آوارہ کی خبر
اب تک وہ جانتا ہے کہ میرے ہی پاس ہے

باقی صدیقی

تو ہی بتا کہ اسے کس طرح میں سمجھاؤں
تری شکایتیں لے کر جو میرے پاس آئے
کچھ اس طرح وہ مری زندگی کے پاس آئے
سنبھل سنبھل کے ٹھکانے مرے حواس آئے

عبدالحمید عدم

تکلیف مٹ گئی مگر احساس رہ گیا
خوش ہوں کہ کچھ نہ کچھ تو مرے پاس رہ گیا

شکیب جلالی

اب اپنے جسم کے سائے میں تھک کے بیٹھ رہو
کہیں درخت نہیں راستے میں ‘ دور نہ پاس
وہ کالے کوس کی دوری اب ایک خواب سی ہے
تم آ گئے ہو‘ مگر کب نہ تھے ہمارے پاس

ظہیر کاشمیری

عشق جب تک نہ آس پاس رہا
حسن تنہا رہا اداس رہا

غلام محمد قاصر

پھر تو اس بے نام سفر میں کچھ بھی نہ اپنے پاس رہا
تیری سمت چلا ہوں جب تک سمتوں کا احساس رہا

رسا چغتائی

دل نے اپنی زباں کا پاس کیا
آنکھ نے جانے کیا قیاس کیا
کچھ عجب طور زندگانی کی
گھر سے نکلے نہ گھر کا پاس کیا

سیف الدین سیف

بے خودی لے اڑی حواس کہیں
ہے کوئی دل کے آس پاس کہیں
ہم بعید و قریب ڈھونڈ چکے
وہ کہیں دور ہے نہ پاس کہیں

احمد فراز

عجیب رت تھی کہ ہر چند پاس تھا وہ بھی
بہت ملول تھا میں بھی، اداس تھا وہ بھی
کسی کے شہر میں کی گفتگو ہواؤں سے
یہ سوچ کر کہ کہیں آس پاس تھا وہ بھی

شاذ تمکنت

ہم نے اک دوسرے کو پرسۂ فرقت نہ دیا
میری خاطر تھی تجھے اور ترا پاس مجھے

محسن نقوی

میں ڈھونڈتا تھا دور خلاؤں میں ایک جسم
چہروں کا اک ہجوم مرے آس پاس تھا

ناصر کاظمی

وہ دلنواز ہے لیکن نظر شناس نہیں
مرا علاج مرے چارہ گر کے پاس نہیں
کبھی کبھی جو ترے قرب میں گزارے تھے
اب ان دنوں کا تصور بھی میرے پاس نہیں
خیر ہو شہرِ شبنم و گل کی
کوئی پھرتا ہے آس پاس اداس
کیوں نہ روؤں تری جدائی میں
دن گزارے ہیں تیرے پاس بہت