قصہ ہے اس کے شہر کا یارو شنیدنی

اب تک ہے یاد اس کی جگا جوت روشنی

رہتی تھی اس میں ایک پری زاد پدمنی

دیواریں سنگِ سرخ کی، دروازے چندنی

خیمے شفق سے لال، چتر تخت کندنی

پھیلی تھی جس کے گردِ گلِ بانس کی بنی

ہر دیس کے پرندوں نے چھائی تھی چھاؤنی

نیلے ، اجال، جوگیے ، گلدار، کاسنی

چونچوں میں خس کی تیلیاں پنجوں میں پینجنی

یکبار گونج اٹھتی تھی سنسان کنگنی

ٹاپوں میں جن کی گرد ہو گردون گردنی

پوشاک جس کی دھوپ تھی، خوراک چاندنی

دیکھی تھی میں نے دور سے بس اس کی روشنی

بیٹھے تھے زیبِ تن کیے ملبوس درشنی

پھر چھیڑ دی ہوائے نیستاں نے سمفنی

کچی نکور باندیاں نکلیں بنی ٹھنی

رکھے تھے رنگ رنگ کے میوے چشیدنی

خستہ کباب سیخ کے اور نان روغنی

لائی سجا کے تھال میں اک شوخ کامنی

بیٹھی تھی شہ نشین پہ اک دختِ ارمنی

دولہا بنا گلال، بسنتی دلہن بنی

پی کر شراب ناچ رہی تھی وہ کنچنی

گل منہ پہ ڈھانپ لیتے تھے کرنوں کی اوڑھنی

مردنگ، ڈھول، تان پرا، سنکھ سنکھنی

نیلے ، سیہ، سفید، ہرے ، لال، جامنی

پھرتی تھی ساتھ ساتھ لگی جس کے چاندنی

ہاتھوں میں سرخ چوڑیاں، شانوں پہ سوزنی

پتلی ہر ایک آنکھ کی ہیرے کی تھی کنی

جوبن کے گھاٹ پر وہ کنول دو شگفتنی

کالے سیاہ بال کہ بدمست ناگنی

اجلے روپہلے گال کہ ورقے نوشتنی

دامن کشیدنی، لب و عارض چشیدنی

سو حسن ظاہری تو کئی وصف باطنی

دل کو رہا ہے شکوۂ کوتاہ دامنی

گھوڑوں کی رتھ میں بیٹھ گئے جب بنا بنی

منہ پھیر کر گزر گئی وہ راج ہنسنی

ٹھہرا نہ دل میں حسن کا رنگِ شکستنی

نیند آ گئی مجھے کہ وہاں چھاؤں تھی گھنی