تو ہے عزیزِ ملت تو ہے نشانِ حیدر

تو عزم کا ستارہ، تو ہے ہلال جرات

گاتے ہیں تیرے نغمے راوی، چناب، جہلم

سلہٹ سے تا کراچی پھیلے ہیں تیرے شہپر

رن کچھ کے معرکے میں جوہر دکھائے تو نے

توپوں کے منہ کو موڑا، ٹینکوں کا مان توڑا

زندہ کیا وطن کو تو نے شہید ہو کر

اونچی تری اڑانیں، کاری ترے نشانے

باندھا ہے وہ نشانہ دشمن کے گھر میں جا کر

بجلی ہیں تیرے بمبر، شاہیں ہیں تیرے سیبر

ساندل کے آسماں سے روکے ہیں تو نے حملے

چھنب اور جوڑیاں میں گاڑا ہے تو نے جھنڈا

ہیبت سے تیری لرزاں کہسار اور سمندر

وہ شہر بلھے شاہ کا بستا ہے تیرے دم سے

داتا کا شہر تو نے پائندہ کر دیا ہے

ہر دیس، ہر نگر میں چرچا ہے تیرا گھر گھر

(۲۹ ستمبر ۱۹۶۵)