وہ جس کی دید میں لاکھوں مسرتیں پنہاں

ہزار فتنے تہ پائے ناز، خاک نشیں

شباب جس سے تخیل پہ بجلیاں برسیں

ادائے لغزشِ پا پر قیامتیں قرباں

سیاہ زلفوں میں وارفتہ نکہتوں کا ہجوم

وہ آنکھ جس کے بناؤ پہ خالق اترائے

وہ ہونٹ فیض سے جن کے بہار لالہ فروش

گداز جسم، قبا جس پہ سج کے ناز کرے

غرض وہ حسن جو محتاج وصف و نام نہیں

کسی زمانے میں اس رہگزر سے گزرا تھا

اور اب یہ راہگزر بھی ہے دلفریب و حسیں

ہوا میں شوخی رفتار کی ادائیں ہیں

غرض وہ حسن اب اس کا جزو منظر ہے