آکہ وابستہ ہیں اس حسن کی یادیں تجھ سے

جس کی الفت میں بھلا رکھی تھی دنیا ہم نے

آشنا ہیں ترے قدموں سے وہ راہیں جن پر

کارواں گزرے ہیں جن سے اسی رعنائی کے

تجھ سے کھیلی ہیں وہ محبوب ہوائیں جن میں

تجھ پہ بھی برسا ہے اس بام سے مہتاب کا نور

تو نے دیکھی ہے وہ پیشانی، وہ رخسار، وہ ہونٹ

تجھ پہ اٹحی ہیں وہ کھوئی ہوئی ساحر آنکھیں

ہم پہ مشترکہ ہیں احسان غمِ الفت کے

ہم نے اس عشق میں کیا کھویا ہے کیا سیکھا ہے

عاجزی سیکھی، غریبوں کی حمایت سیکھی

زیر دستوں کے مصائب کو سمجھنا سیکھا

جب کہیں بیٹھ کے روتے ہیں وہ بے کس جن کے

ناتوانوں کے نوالوں پہ جھپٹتے ہیں عقاب

جب کبھی بکتا ہے بازار میں مزدور کا گوشت

آگ سی سینے میں رہ رہ کے ابلتی ہے نہ پوچھ