تازہ ہیں ابھی یاد میں اے ساقی گلفام

وہ پھول سی کھلتی ہوئی دیدار کی ساعت

امید کہ لو جاگا غمِ دل کا نصیبا

لو ڈوب گئے درد کے بے خواب ستارے

اس بام سے نکلے گا ترے حسن کا خورشید

اس در سے بہے گا تری رفتار کا سیماب

پھر دیکھے ہیں وہ ہجر کے تپتے ہوئے دن بھی

ہر شب وہ سیہ بوجھ کہ دل بیٹھ گیا ہے

تنہائی میں کیا کیا نہ تجھے یاد کیا ہے

آنکھوں سے لگایا ہے کبھی دستِ صبا کو

۔ ٢ ۔

تڑپا ہے اسی طور سے دل اس کی لگن میں

رخسار کے خم میں کبھی کاکل کی شکن میں

ہنس ہنس کے صدا دی، کبھی رو رو کے پکارا

ہر درد کو اجیالا، ہر اک غم کو سنوارا

تنہا نہیں لوٹی کبھی آوازِ جرس کی

سب بھول گئیں مصلحتیں اہلِ ہوس کی

تنہا پسِ زنداں، کبھی رسوا سرِ بازار

کڑکے ہیں بہت اہلِ حکم برسرِ دربار

چھوٹی نہیں اپنوں سے کوئی طرزِ ملامت

ہر داغ ہے اس دل میں بجز داغِ ندامت