ہر اک دور میں ہر زمانے میں ہم

جان دیتے رہے زندگی کے لیے

فقر و فاقہ کا توشہ سنبھالے ہوئے

مال والے حقارت سے تکتے رہے

ہم نے ان پر کیا حرفِ حق سنگ زن

جن پہ آنسو بہانے کو کوئی نہ تھا

سب سے اوجھل ہوئے حکمِ حاکم پہ ہم

لوگ سنتے رہے سازِ دل کی صدا

خونچکاں دہر کا خونچکاں آئینہ

طبعِ شاعر ہے جنگاہِ عدل و ستم

۔ ۲ ۔

چھلنی ہے اندھیرے کا سینہ، برکھا کے بھالے برسے ہیں

پانی میں نہائے ہیں بوٹے

شوپیں کا نغمہ بجتا ہے

جو برف گری تھی اس پہ لہو کے چھینٹوں کی رشنائی ہے

شوپیں کا نغمہ بجتا ہے

ہر سو دشمن کا نرغہ تھا، کچھ بچ نکلے ، کچھ کھیت رہے

شوپیں کا نغمہ بجتا ہے

وہ یاد میں تنہا روتی تھی، لپٹائے اپنی باہوں میں

شوپیں کا نغمہ بجتا ہے

اک باپ کے پتھر چہرے کو

اک ماں نے رو کر چوما ہے

پھر پھولوں کی رت لوٹ آئی

پھر جھرنے ناچے چھن چھن چھن

شوپیں کا نغمہ بجتا ہے

-------------------------