ظالم

مرگِ انبوہ کا تہوار مناؤ لوگو

تم کو دن رات سے آزاد کیا ہے میں نے

بسترِ خواب سے کیا چاہتے ہو

سارے خوابوں کا گلا گھونٹ دیا ہے میں نے

فصلِ گل آئے گی نمرود کے انگار لیے

ابر آئے گا خس و خار کے انبار لیے

میرے قانوں بھی نئے میری شریعت بھی نئی

سرو قد مٹی کے بونوں کے قدم چومیں گے

عرش پر آج ہر اک بابِ دعا بند ہوا

رات چھائی تو ہر اک درد کے دھارے چھوٹے

دوپہر آئی تو ہر رگ نے لہو برسایا

یا خدا یہ مری گردانِ شب و روز و سحر

کیا یہی کچھ مری قسمت میں لکھا ہے تو نے

وہ یہ کہتے ہیں تو خوشنود ہر اک ظلم سے ہے

گر یہ سچ ہے تو ترے عدل سے انکار کروں؟

ندائے غیب

کہ اپنی فردِ عمل سنبھالے

پڑیں گے دارو رسن کے لالے

جزا سزا سب یہیں پہ ہو گی

یہیں سے اٹھے گا شورِ محشر