اوچھی تھی لگی بولنے اترا کے بڑا بول

چاندی کی انگوٹھی بھی ہے کچھ گہنوں میں گہنا

وہ اور ہے میں اور یہ ذلت نہ سہوں گی

وہ ذات کی گھٹیا ہے نہیں اس کا ٹھکانا

وہ مول میں اور تول میں میرے نہیں پاسنگ

چاندی ہے کہ ہے رانگ مجھے اس میں بھی شک ہے

اللٰہ رے ملمع کی انگوٹھی تیرے چھل بل

دو دن میں بھڑک اس کی اتر جائے گی ساری

جھوٹوں نے جو سچوں کو چڑھایا بھی تو پھر کیا

جب تاؤ دیا جائے گا ہو جائے گا منہ فق

مشہور مثل ہے کہ نہیں سانچ کو کچھ آنچ

چھوٹے کو بڑا بن کے ابھرنا نہیں اچھا