نہیں معلوم زریونؔ اب تمہاری عمر کیا ہو گی

تمہارے دل کے اس دنیا سے کیسے سلسلے ہوں گے

تمہاری صبح جانے کن خیالوں سے نہاتی ہو

نہ جانے کون دوشیزہ تمہاری زندگی ہو گی

اسے تم فون کرتے اور خط لکھتے رہے ہو گے

یہ خط لکھنا تو دقیانوس کی پیڑھی کا قصہ ہے

وہ ہنستی ہو تو شاید تم نہ رہ پاتے ہو حالوں میں

گماں یہ ہے تمہاری بھی رسائی نارسائی ہو

وہ شاید مائدے کی گند بریانی نہ کھاتی ہو

وہ دوشیزہ بھی شاید داستانوں کی ہو دل دادہ

تہمتن یعنی رستمؔ تھا گرامی سامؔ کا وارث

(یہ میری ایک خواہش ہے جو مشکل ہے )

وہ نوحوں کے ادب کا طرز تو پہچانتی ہو گی

نہ ہوں گے خواب اس کا جو گویے اور کھلاڑی ہوں

نہ جانے وقت کی پیکار میں تم کس طرف ہو گے

ہمیں اس رن میں کچھ بھی ہو کسی جانب تو ہونا ہے

ہزاروں سال سے جیتے چلے آئے ہیں مر مر کے

مری پیکار ازل سے

ہمارا غالبؔ اعظم تھا چور آقائے بیدلؔ کا

سدھارت بھی تھا شرمندہ کہ دو آبے کا باسی تھا

وہ گویا اس کی ہی اک پر نمو ڈالی سے نکلی ہے

نم لب کو ترستی ہیں سو پیاس ان کی نہ پوچھو تم

عوامُ الناس سے پوچھو بھلا الکحل میں کیا ہے

کہ میری جان میرے دل سے رشتہ کھو نہیں سکتی

عبث کا نرخ تو اس وقت بڑھنا چاہیے بھی تھا

وجود اک وہم ہے اور وہم ہی شاید حقیقت ہے

ہے ''ز'' بازار میں تو درمیاں زریونؔ میں اول

تو یہ زریونؔ جو ہے کیا یہ افلاطون ہے کوئی

ہیں معجونیں مفید ''ارواح'' کو معجون یوں ہوتا

بہت جنجال ہیں پر ہو یہاں تو ''یا'' میں اور ''یا'' میں

ہے شاید مجھ کو ساری عمر اس کے سحر میں رہنا

بہت ٹچا سہی ان کا بھی کوئی ماجرا ہو گا

ہمارا خون بھی سچ مچ کا صحنے پر بہا ہو گا

قیامت سانحہ مطلب قیامت فاجعہ پرور

سو میں نے ساحت دیروز میں ڈالا ہے اب ڈیرا

مرے گھر کا وہی سرنام تر ہے جو بھی بسمل ہے

سو اک معمول ہے عمران کے گھر کا عجب سا کچھ

وہ اپنی نفی سے اثبات تک معشر کے پہنچا ہے

وہ سود حال سے یکسر زیاں کارانہ گزرا ہے

سو فوراً بنت اشعت کا پلایا پی گیا ہو گا

تمہاری ارجمند امی کو میں بھولا بہت دن میں

وہی تو ہیں جنہوں نے مجھ کو پیہم رنگ تھکوایا

لہو اور تھوکنا اس کا ہے کاروبار بھی میرا

میں وہ ہوں جس نے اپنے خون سے موسم کھلائے ہیں

میں اک تاریخ ہوں اور میری جانے کتنی فصلیں ہیں

حوادث ماجرا ہی ہم رہے ہیں اک زمانے سے

ہمیشہ سے بپا اک جنگ ہے ہم اس میں قائم ہیں

یہ چرخ جبر کے دوار ممکن کی ہے گرویدہ

سنان و گرز و شمشیر و تبر خنجر نہیں لازم

کہ نفی عین عین و سر بہ سر ضدین ہیں دونوں

بصد دل دانشی گزران اپنی مجھ پہ طاری کی

پلک تک اس نے مرنے کے لیے جینے نہ دی مجھ کو

مجھے تیری خیانت نے غضب مجروح کر ڈالا

رضا کی جاؤدانہ جبر کی نوبت بھی آ پہنچی''

محبت اپنی یک طوری میں دشمن ہے محبت کی

سخن سو طرح سے اک رمز کی رسوائی کرتا ہے

وہ ہے تعبیر کا افلاس جو ٹھہرا ہے فن میرا

سخن ور ایزد اچھا تھا کہ آدم یا پھر اہریمن

کچھ ایسا ہے یہ میں جو ہوں یہ میں اپنے سوا ہوں ''میں''

جو ہونے میں ہو وہ ہر لمحہ اپنا غیر ہوتا ہے

یوں ہی بس یوں ہی زینوؔ نے یکایک خودکشی کر لی

بدہ یارا ازاں بادہ کہ دہقاں پرورد آں را

بہ سوزد ایں زمین اعتبار و آسماناں را

دل و جاں اور آسائش یہ اک کونی تمسخر ہے

حمق کی عبقریت اور سفاہت کے تفکر نے

اور افلاطون اقدس نے ہمیں اعیان بخشے ہیں

نظر سے دور منظر کا سر و سامان ثروت ہو

زمانی زد میں ظن کی اک گمان لازمانی ہے

کہانی سننے والے جو بھی ہیں وہ خود کہانی ہیں

پیا پے یہ گدازش یہ گماں اور یہ گلے کیسے

تو میں کیا کہہ رہا تھا یعنی کیا کچھ سہہ رہا تھا میں

رکو میں بے سر و پا اپنے سر بھاگ نکلا ہوں

There is an absurd I ان absurdity شاید

تم اس absurdity میں اک ردیف اک قافیہ ٹھہرو

شکست ناروا نے مجھ کو پارہ پارہ کر ڈالا

میں اپنے آپ میں ہارا ہوں اور خوارانہ ہارا ہوں

جسے فن کہتے آئے ہیں وہ ہے خونِ جگر اپنا

کوئی خونِ جگر کا فن ذرا تعبیر میں لائے

وجود و شعر یہ دونوں define ہو نہیں سکتے

حساب حرف میں آتا رہا ہے بس حسب ان کا

ہے ازد ایزداں اک رمز جو بے رمز نسبت ہے

نہ جانے جبر ہے حالت کہ حالت جبر ہے یعنی

وجود اک جبر ہے میرا عدم اوقات ہے میری

میں روز و شب نگارش کوش خود اپنے عدم کا ہوں

ہیں کڑواہٹ میں یہ بھیگے ہوئے لمحے عجب سے کچھ

سرابوں نے سرابوں پر بہت بادل ہیں برسائے

(یقیناً قافیہ ہے یاوہ فرمائی کا سر چشمہ

نہ جانے عاربہ کیوں آئے کیوں مستعربہ آئے

مرے جد ہاشم عالی گئے غزہ میں دفنائے

لدوا للموت وابنو للحزاب سن خراباتی

یہ ظالم تیسرا پیگ اک اقانیمی بدایت ہے

بھلا حورب کی جھاڑی کا وہ رمز آتشیں کیا تھا

یہ نسبت کے بہت سے قافیے ہیں ہے گلہ اس کا

گماں یہ ہے کہ شاید بحر سے خارج نہیں ہوں میں

تنا تن تن تنا تن تن تنا تن تن تنا تن تن

نہ پیراہن نہ پوری آدھی روٹی اب رہا سالن

ہے ان کی بے حسی میں تو مقدس تر حرامی پن

کوئی موج ۔۔۔کوئی موج شمال جاؤداں جانے

وہ ہو گزرے تو پھر خود میں نے بھی جانا وہ ہو گزرے

ہے اب بھی اپنی پونجی اک ملال جاؤدان جاں

یہی ہے دل کا مضمون اب تمہاری عمر کیا ہو گی

لب تشنہ پہ اک زہر حقیقت کا فسانہ ہے

نہ دل کو آزمانا ہے نہ جاں کو آزمانا ہے

کہاں اب جادۂ خرم میں سرسبزانہ جانا ہے

وہی دل کی حقیقت جو کبھی جاں تھی وہ اب آخر

ہمارا باہمی رشتہ جو حاصل تر تھا رشتوں کا

کسی کا نام لکھا ہے مری ساری بیاضوں پر

یہ اک شام عذاب بے سروکارانہ حالت ہے

نہیں معلوم تم اس وقت کس معلوم میں ہو گے

میں تھا مفہوم نا مفہوم میں گم ہو چکا ہوں میں

نہیں معلوم زریونؔ اب تمہاری عمر کیا ہو گی

مرے قامت سے اب قامت تمہارا کچھ فزوں ہو گا

حساب ماہ و سال اب تک کبھی رکھا نہیں میں نے

میں اپنے آپ میں کب رہ سکا کب رہ سکا آخر

حساب ماہ و سال و روز و شب وہ سوختہ بودش

جسے یہ بھی نہ ہو معلوم وہ ہے بھی تو کیوں کر ہے

کوئی نسبت بھی اب تو ذات سے باہر نہیں میری

بہ حال ناشتا صد زخم ہا و خون ہا خوردم

تمہیں اس بات سے مطلب ہی کیا اور آخرش کیوں ہو

جو ہے اک ننگ ہستی اس کو تم کیا جان بھی لو گے

تمہیں مجھ سے جو نفرت ہے وہی تو میری راحت ہے

کہ آخر اس جہاں کا ایک نظام کار ہے آخر

میں خود میں جھینکتا ہوں اور سینے میں بھڑکتا ہوں

ہے میری زندگی اب روز و شب یک مجلسِ غم ہا

تمہاری تربیت میں میرا حصہ کم رہا کم تر

زباں اپنی زباں میں تم کو آخر کب سکھا پایا

زباں کا کام یوں بھی بات سمجھانا نہیں ہوتا

کبھی خود تک بھی مطلب کوئی پہنچانا نہیں ہوتا

بھلا کیا اعتباری اور کیا نا اعتباری ہے

سخن ہی کیا فسانوں کا دھرا کیا ہے فسانوں میں

میں اک افسوس تھا افسوس ہوں گزرے زمانوں میں

مرے سینے میں کب سوزندہ تر داغوں کے ہیں تھالے

تم اپنی مام کے بے حد مرادی منتوں والے

مگر پہلے کبھی تم سے مرا کچھ سلسلہ تو تھا

وہ میری جاؤدانہ بے دوئی کا اک صلہ تو تھا

سایۂ دامان رحمت چاہیے تھوڑا مجھے

عید کے دن مصطفی سے یوں لگے کہنے حسینؔ

''ادب ادب کتے ترے کان کاٹوں

تاروں بھرے جگر جگر خوان باٹوں

زریونؔ کو آ کے سلا کیوں نہ جا''

''چوکی آنگن میں بچھی واسطی دولہا کے لیے ''

شاہ مرداں امیرالمومنین حضرت علیؔ کے پوتے

حضرت امام علی نقیؔ کے پوتے

سید ابو الفرح صیدوای الواسطی کے پوتے

سید حسینؔ شرف الدین شاہ ولایت کے پوتے

دیوان سید حامدؔ کے پوتے

سید جونؔ ایلیا حسنی الحسینی سپوت جاہ''

بس اک پل ہف صدی کا فیصلہ کرنے ہی والا ہے

وہی راحت میں ہے جو عام سے ہونے کو اپنا لے

تمہیں بہکا نہ پائے اور بیرونی نہ کر ڈالے

بہت دکھ دے گی تم میں فکر اور فن کی نمو مجھ کو

دوام جہل و حال استراحت چاہتا ہوں میں

وہ سارے خواب تھے قصاب جو دیکھا کیا ہوں میں

مرے جحیمیم ذات ذات سے تم دور ہی ٹھہرو

کوئی بھی بینک کا افسر سینٹر کوئی پایندہ

سو ظاہر ہے اسے شے سے زیادہ مانتا ہوں میں

تمہیں اے کاش بیماری نہ ہو دیوار پڑھنے کی

وہ معلومات کے میدان کے شوقین بوڑھے تھے

وہ کیسے اپنا بنجر نام بنجر پن میں بوتے ہیں

اسی باعث میں ہوں انبوہ کی لذت سے بے مایہ

سنو راے دہندہ بن ہوئے تم باز مت آنا

فقط زریونؔ ہو تم یعنی اپنا لاحقہ چھوڑو

بھلا کیوں ہو مرے احساس کے اسباب میں کچھ بھی

مگر میں یعنی جانے کون اچھا میں سراسر میں

میں اک ننگین بودش ہوں پہ تم تو سر منعم ہو

یہ قلقل تیسرا پیگ اب تو چوتھا ہو گماں یہ ہے

گماں یہ ہے کہ میں جو جا رہا تھا آ رہا ہوں میں

یہ چوتھا پیگ ہے اوں ہوں ذلالت کی گئی مجھ سے

جذامی ہو گئی وضاحؔ کی محبوب واویلا

سنو میری کہانی پر میاں میری کہانی کیا

بہت کچھ تھا کبھی شاید پر اب کچھ بھی نہیں ہوں میں

کبھی کی بات ہے فریاد میرا وہ کبھی یعنی

میں اپنے شہر کا سب سے گرامی نام لڑکا تھا

مرے دم سے غضب ہنگامہ رہتا تھا محلوں میں

مرے ہندو مسلماں سب مجھے سر پر بٹھاتے تھے

سخن بہتا چلا آتا ہے بے باعث کے ہونٹوں سے

میں اشراف کمینہ کار کو ٹھوکر پہ رکھتا تھا

میں شاید اب نہیں ہوں وہ مگر اب بھی وہی ہوں میں

مگر میرا تھا اک طور اور بھی جو اور ہی کچھ تھا

میں اپنے شہر علم و فن کا تھا اک نوجواں کاہن

مرا بابا مجھے خاموش آوازیں سناتا تھا

وہ ہیئت داں وہ عالم ناف شب میں چھت پہ جاتا تھا

اسے خواہش تھی شہرت کی نہ کوئی حرص دولت تھی

مری ماں کی تمناؤں کا قاتل تھا وہ قلامہ

ستم یہ ہے یہ کہنے سے جھجکتا تھا وہ فہامہ

خلف اس کے خذف اور بے نہایت نا خلف نکلے

میں اس عالم ترین دہر کی فکرت کا منکر تھا

پر اب میری یہ شہرت ہے کہ میں بس اک شرابی ہوں

سگان خوک زاد برزن و بازار بے مغزی

زنا زادے مری عزت بھی گستاخانہ کرتے ہیں

مجھے اس شام ہے اپنے لبوں پر اک سخن لانا

وہ سبطین محمد، جن کو جانے کیوں بہت ارفع

کہ اس نسبت سے زہر و زخم کو سہنا ضروری ہے

وہ شجرہ جو کنانہ فہر غالب کعب مرہ سے

وہ اک اندوہ تھا تاریخ کا اندوہ سوزندہ

کسی تنور کے ہیزم کی خاکستر ہی بننا تھا

ہمارا فخر تھا فقر اور دانش اپنی پونجی تھی

مرے ہم شہر زریونؔ اک فسوں ہے نسل، ہم دونوں

میں جب اوسان اپنے کھونے لگتا ہوں تو ہنستا ہوں

ہمیشہ میں خدا حافظ ہمیشہ میں خدا حافظ

خدا حافظ