کتنے گھناگھن گھومتے عالم

جن کا مآل — اک سانس کی مہلت

جس کی لرزتی روشنیوں میں

جھلکے اک مسحور مسافت!

جس کی خونیں سطح پہ تڑپے

میں جکڑی انسان کی قسمت

اس منڈلی میں پہیم دھڑکے

پیہم باجے ، درد کی نوبت

اس جیون میں، غم، دمِ خنجر

میں نے پیا ہر زہر سے امرت!

پگ پگ شعلے ، تٹ تٹ طوفاں

بجھتے جگوں کی راکھ میں لت پت!

بند کواڑوں سے ٹکراتا

میرا رزق، سسکتی چاہت!

گلیاں، موڑ، منڈیریں، دوارے

ارمانوں کی بچھڑتی سنگت!

آرزوؤں کا دیس کہ جس کی

آنکھ کی جھیلیں، دھوئیں کے پربت!

میں نے تراشی، نظم کے ایواں

اک اک سوچ کی حیراں مورت!

تلخیِ صد احساس کے تیشے

حرفِ زبوں — اک کانچ کی لعبت!

کیا شے ہے یہ حرف و بیاں کا

صورت معنٰی؟ معنٰی صورت؟

وادیِ فکر کی لیلاؤں کے

طے نہ ہوا ویرانۂ حیرت!

کتنے ترانے ، کتنے فسانے

دل میں رہی سب دل کی حکایت!

سوچتے دن اور جاگتی راتیں

ایک یہی اظہار کی حسرت!