اجلے جھاگ اڑاتی جا
رئیس فروغؔ
پگلی ندیا گاتی جا
اجلے جھاگ اڑاتی جا
گیابھن گیا آئی ہے
ٹھنڈی لہر پلاتی جا
دھول اڑاتے گیندوں کو
آئینہ دکھلاتی جا
دلدل کے گھڑیالوں کو
مل مل کے نہلاتی جا
خول کے اوپر اوپر ہی
کچھوے کو سہلاتی جا
ڈال پہ سوئے پنچھی کو
چھینٹوں سے چونکاتی جا
کانٹے میں جو چارا ہے
اس کی جان بچاتی جا
جنگل کی اندھیاری میں
دیپک بان چلاتی جا
کالے پیلے بادل کو
پتوں میں الجھاتی جا
ناؤ برابر مچھلی دے
مانجھی کو بہلاتی جا
پلکوں کی جھالریا سے
سپنوں تک لہراتی جا
ندیا اندھے دھوبی کے
پتھر کو چمکاتی جا