روح بے چین ہے اک دل کی اذیت کیا ہے

وہ مجھے بھول گئی اس کی شکایت کیا ہے

وہ کہاں اور کہاں کاہش غم، سوزش جاں

اس کا احساس لطیف اور شکست ارماں

جھک گئی ہو گی جواں سال امنگوں کی جبیں

چھا گیا ہو گا دھواں، گھوم گئی ہو گی زمیں

دل نے ایسے بھی کچھ افسانے سنائے ہوں گے

بند کمرے میں جو خط میرے جلائے ہوں گے

اس نے گھبرا کے نظر لاکھ بچائی ہو گی

میز سے جب مری تصویر ہٹائی ہو گی

بے محل چھیڑ پہ جذبات ابل آئے ہوں گے

نام پر میرے جب آنسو نکل آئے ہوں گے

زلف ضد کر کے کسی نے جو ہٹائی ہو گی

برق عشووں نے کئی دن نہ گرائی ہو گی