مرزا غالب

دل میں پھر گریے نے اک شور اٹھایا غالب
آہ جو قطرہ نہ نکلا تھا سو طوفاں نکلا
غالب ہمیں نہ چھیڑ، کہ پھر جوشِ اشک سے
بیٹھے ہیں ہم تہیۂِ طوفاں کیے ہوئے

حیدر علی آتش

عرق آلودہ جبیں دیکھ کے دل ڈوب گیا
شبنم باغ سے طوفاں نہ ہوا تھا سو ہوا

شیخ ابراہیم ذوق

دل بھی ہے بلا قابل مشقِ ستم و ناز
جو تیر ہے اس تودۂِ طوفاں کے لیے ہے

مصحفی غلام ہمدانی

ہر دم آتے ہیں بھرے دیدۂِ گریاں تجھ بن
مجھ کو یہ ڈر ہے کہ لائیں نہ یہ طوفاں تجھ بن

مصطفٰی خان شیفتہ

مجھے یوں بٹھاتے وہ کب بزم میں
اٹھائے رقیبوں نے طوفاں عبث

عبدالحمید عدم

کیا میرے سفینے ہی کی دریا کو کھٹک تھی
کیا بات ہے اب کیوں کوئی طوفاں نہیں اٹھتا
خیال آتا ہے جب بھی دلبروں کی ہم نشینی کا
تلاطم رنگ کے خوشبو کے طوفاں یاد آتے ہیں

قمر جلالوی

اے ناخدا وہ حکمِ خدا تھا جو بچ گئی
کشتی کو اب تو چھوڑ دے دے طوفاں کے ساتھ ساتھ

مجید امجد

لوحیں طاق پہ ہیں اور ان کے نوشتے
تقدیروں میں تڑپنے والے طوفاں

مصطفی زیدی

دبا رکھو یہ لہریں ایک دن آہستہ آہستہ
یہی بن جائیں گی تمہید طوفاں دیکھتے رہنا

رئیس فروغؔ

بستی یونہی بیچ میں آئی اصل میں جنگ تو مجھ سے تھی
جب تک میرے باغ نہ ڈوبے زور نہ ٹوٹا طوفاں کا

احسان دانش

دل میں ہر خون کا قطرہ ہے تلاطم بہ کنار
جو مگر آنکھ سے ٹپکا وہی طوفاں نہ ہوا

بہزاد لکھنوی

تسکینِ دل کی ہم نے بھی پروا چھوڑ دی
ہر موجِ غم کو حاصل طوفاں بنا لیا

بیان میرٹھی

جسے سب نوح کے فرزند کہتے ہیں کہ طوفاں تھا
کسی جاندادۂ خاموش کا اندوہ پنہاں تھا

ضیا جالندھری

تیرے دکھ کو پا کر ہم تو اپنا دکھ بھی بھول گئے
کس کو خبر تھی تیری خموشی تہہ در تہہ اک طوفاں ہے