مجھ کو یہ ڈر ہے کہ لائیں نہ یہ طوفاں تجھ بن
مصحفی غلام ہمدانی
ہر دم آتے ہیں بھرے دیدۂِ گریاں تجھ بن
مجھ کو یہ ڈر ہے کہ لائیں نہ یہ طوفاں تجھ بن
لالہ و گل کی طرف کس کی بلا دیکھے ہے
جی کو بھاتی ہی نہیں سیر گلستاں تجھ بن
آ گیا بسکہ خلل مذہب و ملت میں مری
نہ رہا گبر میں پیارے نہ مسلماں تجھ بن
دل گیا دین گیا صبر گیا تاب گئی
یوں ہی اپنے تو ہوئے سیکڑوں نقصاں تجھ بن
نہ کھلے غنچۂِ تصویر کے مانند کبھو
لبِ خاموش مرے اے گلِ خنداں تجھ بن
جب سے اے گل تو گیا بستر عاشق پہ ترے
گل بالیں نہ ہوئے سنبل و ریحاں تجھ بن
سامنے سے مری آنکھوں کے نہ جا مان کہا
کس کو دیکھوں گا میں پھر اے مہِ تاباں تجھ بن
روز دشمن کا بھی اس طرح نہ کٹیو یارب
میں نے جس ظلم سے کاٹی شبِ ہجراں تجھ بن
مہِ نو شام کے ہوتے ہی تصور میں ترے
تھا کھڑا سر پہ لیے خنجر عریاں تجھ بن
اور جو جاتی تھی کبھی خوشۂِ پرویں پہ نگاہ
وہ بھی لگتا تھا صنم دستۂِ پیکاں تجھ بن
مصحفیؔ جا کے گلستاں میں کرے کیا پیارے
کہ گلستاں ہے اسے خانۂِ زنداں تجھ بن