مرزا غالب

لے گئے خاک میں ہم داغ تمنائے نشاط
تو ہو اور آپ بہ صد رنگِ گلستاں ہونا
مجھے اب دیکھ کر ابر شفق آلودہ یاد آیا
کہ فرقت میں تری آتش برستی تھی گلستاں پر
نگہِ گرم سے ایک آگ ٹپکتی ہے ، اسدؔ!
ہے چراغاں ، خس و خاشاک گلستاں مجھ سے
اک نوبہار ناز کو تاکے ہے پھر نگاہ
چہرہ فروغ مے سے گلستاں کیے ہوئے

انشاء اللہ خان انشا

نرگس کی آنکھ کی قسم اور گل کے کان کی
تجھ کو سر عزیز گلستاں کی قسم

حیدر علی آتش

خار مطلوب جو ہووے تو گلستاں مانگوں
بجلی گرنے کو جو جی چاہے تو باراں مانگوں
نزدیک آ چکی ہے سواری بہار کی
برگِ خزاں رسیدہ گلستاں سے دور ہوں
نعرہ زن کنج شہیداں میں ہو بلبلِ کی طرح
آب آہن نے کیا ہے یہ گلستاں پیدا
اک گل ایسا نہیں ہووے نہ خزاں جس کی بہار
کون سے وقت ہوا تھا یہ گلستاں پیدا
بلبل کو خار خار دبستاں ہے ان دنوں
ہر طفل کی بغل میں گلستاں ہے ان دنوں
باغ جہاں میں جو ہے گرفتار ہے ترا
آزاد ایک سرو گلستاں ہے ان دنوں

مصحفی غلام ہمدانی

کیا کریں جا کے گلستاں میں ہم
ہیں بہ کنجِ قفس فغاں میں ہم
مغرور کیوں نہ ہووے صنعت پر اپنی صانع
کس واسطے جب اس نے یہ گلستاں بنایا
لالہ و گل کی طرف کس کی بلا دیکھے ہے
جی کو بھاتی ہی نہیں سیر گلستاں تجھ بن

مصطفٰی خان شیفتہ

غم غلط کرنے کو احباب ہمیں جانب باغ
لے گئے کل تو عجب رنگِ گلستاں دیکھا
شریک بلبل و قمری ہیں وہ زبوں فطرت
جو بے قرار رہے سیر گلستاں کے لیے
نہ کر فاش راز گلستاں عبث
نہ ہو بلبلِ زار نالاں عبث

مومن خان مومن

جس کوچہ میں گزار صبا کا نہ ہو سکے
اے عندلیب اس کے لیے گلستاں نہ چھوڑ

فیض احمد فیض

شاخ پر خونِ گل رواں ہے وہی
شوخی رنگِ گلستاں ہے وہی

باقی صدیقی

کہیں بن قبا نہ کھل سکتا
دشت ہوتے نہ گلستاں ہوتے
خوں رو رہے تھے کل جو بہاروں کی یاد میں
وہ آج بے نیاز غم گلستاں ملے
زندگی نام ہے بہاروں کا
گل نہیں گلستاں کی بات کریں
ہر کلی سے لہو ٹپکنے لگا
شوق تعمیر گلستاں دیکھو
ہائے وہ قافلے جو لٹ کر بھی
زیر دیوارِ گلستاں ٹھہرے
دل کو ہے پھر چند کانٹوں کی تلاش
پھر نہ سیر گلستاں کرنا پڑے
اشک شبنم ہوں یا تبسمِ گل
ابھی ہر راز گلستاں تک ہے
دشت دیکھے ہیں گلستاں دیکھے
تیرے جلوے یہاں وہاں دیکھے
زخموں کی تاب ہے نہ تبسم کا حوصلہ
ہم کیا کریں گے آپ گلستاں خریدیے

قمر جلالوی

کچھ گلوں کو ہیں نہیں میری اسیری کا الم
سوکھ کر کانٹا ہر اک خار گلستاں ہو گیا
خوشبو کا ساتھ چھٹ نہ سکا تا حیات گل
لے بھی گئی شمیم تو کیا گلستاں سے دور
ہم نفس صیاد کی عادت کو میں سمجھتا نہ تھا
بھول کر نظریں مری سوئے گلستاں ہو گئیں
آشیاں اپنا اٹھاتے ہیں سلام اے باغباں
بجلیاں اب دشمنِ جانِ گلستاں ہو گئیں
دیکھ اے صیاد چھینٹے خوں کے ہر تیلی پر ہیں
ہم ترے کنجِ قفس کو بھی گلستاں کر چلے
پھول سب اچھی طرح تھے باغباں اچھی طرح
میرے آنے تک تھا سارا گلستاں اچھی طرح
خطا بہار میں کچھ باغباں کی ہو تو کہوں
مرے نصیب میں لکھا تھا گلستاں سے گریز
اے باغباں گلوں پہ ہی بجلی نہیں گری
ہم بھی لٹے ہیں تیرے گلستاں کے ساتھ ساتھ
اہلِ قفس کا اور تو کچھ بس نہ چل سکا
آہیں بھریں نسیمِ گلستاں کے ساتھ ساتھ

اختر شیرانی

ہے بہارِ گل و لالہ مرے اشکوں کی نمود
میری آنکھوں نے کھلائے ہیں گلستاں کیا کیا
پامال خزاں ہونے کو ہیں مست بہاریں
ہے سیرِ گل و حسن‌ گلستاں کوئی دن اور

اسرار الحق مجاز

آؤ اب مل کے گلستاں کو گلستاں کر دیں
ہر گل و لالہ کو رقصاں و غزل خواں کر دیں

ظہیر کاشمیری

نکلے گی بوئے زلف ہماری تلاش میں
صحرا میں اب ہوائے گلستاں بھی آئے گی

ماجد صدیقی

دل کا احوال کیا کہیں ماجدؔ
گو بظاہر تو گلستاں ہیں ہم

تلوک چند محروم

ایک ہم ہیں اپنے گلشن کو جو صحرا کر چکے
ایک وہ ہیں دشت میں جو گلستاں پیدا کریں

جوش ملیح آبادی

خدا کی رحمتیں اے مطرب رنگیں نوا تجھ پر
کہ ہر کانٹے میں تو نے روح دوڑا دی گلستاں کی
آنچوں میں گنگناتے ہیں گلزار گاہ گاہ
شعلوں سے پٹ گیا ہے گلستاں کبھی کبھی

حفیظ جالندھری

دور رفتہ دیکھ لیتا ہوں گلستاں دیکھ کر
گل کو خنداں دیکھ کر بلبل کو گریاں دیکھ کر

حفیظ ہوشیارپوری

تختۂ دار ہے کہ تختۂ گل
بوئے خوں گلستاں سے آتی ہے

خاطر غزنوی

تری طلب تھی ترے آستاں سے لوٹ آئے
خزاں نصیب رہے گلستاں سے لوٹ آئے
گلوں کی محفل رنگیں میں خار بن نہ سکے
بہار آئی تو ہم گلستاں سے لوٹ آئے

سید ضمیر جعفری

عرصہ ہوا وہ زلفِ پریشاں نہیں دیکھی
مدت ہوئی نظروں سے گلستاں نہیں گزرے
آرزوؤں سے جو پیمانِ وفا ہم رکھتے
سانحے زخم بھی ہوتے تو گلستاں ہوتے

سیف الدین سیف

بڑے خطرے میں ہے حسن گلستاں ہم نہ کہتے تھے
چمن تک آ گئی دیوارِ زنداں ہم نہ کہتے تھے
سیفؔ یہ چشمکیں یہ رنگ بہار
کیا اسی گلستاں کے ہم بھی ہیں

سلام مچھلی شہری

ہم ایسے لوگ جلد اسیر‌ خزاں ہوئے
لیکن غرور‌ و تمکنت گلستاں ہوئے
چمن شہر تو ویراں تھا مگر اس گھر میں
اتنی نکہت ہے کہ تم ایک گلستاں ہو ضرور

سیماب اکبر آبادی

خود اٹھ کے ہاتھ میرے گریباں میں آ گئے
شاید قدم جنوں کے گلستاں میں آ گئے

شکیل بدایونی

ان کے بغیر ہم جو گلستاں میں آ گئے
محسوس یہ ہوا کہ بیاباں میں آ گئے
زمانہ جو آتش فشاں ہے تو کیا غم
ہم آتش کدے کو گلستاں کریں گے

اکبر حمیدی

یہ شاخ گل جو گھری ہے ہزار کانٹوں میں
مجھے اسی سے نیا گلستاں بنانا ہے

احمد فراز

اول اول کی محبت کے نشے یاد تو کر
بے پیے بھی ترا چہرہ تھا گلستاں جاناں

فراق گورکھپوری

وہ شان خامشی کہ بہاریں ہیں منتظر
وہ رنگ گفتگو کہ گلستاں بنا دیا
کیا ہے دیکھو حسرت سیر گلستاں کچھ نہیں
کچھ نہیں اے ساکنان کنجِ زنداں کچھ نہیں

قابل اجمیری

اے دولت سکوں کے طلبگار دیکھنا
شبنم سے جل گیا ہے گلستاں کبھی کبھی
زلف میں خوشبو نہ تھی یا رنگ عارض میں نہ تھا
آپ کس کی آرزو میں گلستاں تک آ گئے
برہم ہوں بجلیاں کہ ہوائیں خلاف ہوں
کچھ بھی ہو اہتمام گلستاں کریں گے ہم

مجروح سلطان پوری

جس طرف بھی چل پڑے ہم آبلہ پایان شوق
خار سے گل اور گل سے گلستاں بنتا گیا

ناصر کاظمی

اب کی فصلِ بہار سے پہلے
رنگ تھے گلستاں میں کیا کیا کچھ