شاید قدم جنوں کے گلستاں میں آ گئے
سیماب اکبر آبادی
خود اٹھ کے ہاتھ میرے گریباں میں آ گئے
شاید قدم جنوں کے گلستاں میں آ گئے
اس کے سوا بتائیں اسیری کا کیا سبب
گھبرائے انجمن سے تو زنداں میں آ گئے
کیا ہو گا چار پھولوں سے اے موسمِ بہار
یہ تو ہمارے گوشۂ داماں میں آ گئے
جوشِ بہار اور یہ بے اختیاریاں
سوئے چمن چلے تھے بیاباں میں آ گئے
سیمابؔ کبر و ناز کا انجام کچھ نہ پوچھ
سب رفتہ رفتہ گورِ غریباں میں آ گئے
مفعول فاعلات مفاعیل فاعِلن
مضارع مثمن اخرب مکفوف محذوف