مرزا غالب

ہنوز اک ’’پرتوِ نقشِ خیالِ یار‘‘ باقی ہے
دلِ افسردہ ، گویا، حجرہ ہے یوسف کے زنداں کا
شرح اسباب گرفتاری خاطر مت پوچھ
اس قدر تنگ ہوا دل کہ میں زنداں سمجھا
نہ چھوڑی حضرتِ یوسف نے یاں بھی خانہ آرائی
سفیدی دیدۂِ یعقوب کی پھرتی ہے زنداں پر
قید میں یعقوب نے لی گو نہ یوسف کی خبر
لیکن آنکھیں روزن دیوارِ زنداں ہو گئیں

حیدر علی آتش

ممکن نہیں نجات اسیران عشق کو
یہ قیدی وہ نہیں کہ جو زنداں سے دور ہوں
روح کی طرح سے داخل ہو جو دیوانہ ہے
جسم خاکی سمجھ اس کو جو ہو زنداں پیدا
کہتے ہیں ہم زمین میں مجنوں کی اب غزل
ہر بیت اپنی خانۂِ زنداں ہے ان دنوں

شیخ ابراہیم ذوق

نکلے کوئی کیا قید علائق سے کہ اے ذوقؔ
در ہی نہیں اس خانۂِ زنداں کے لیے ہے
میں وہ مجنوں ہوں جو نکلوں کنجِ زنداں چھوڑ کر
سیب جنت تک نہ کھاؤں سنگ طفلاں چھوڑ کر

مصحفی غلام ہمدانی

رہنے کے لیے ہم سے گنہ گاروں کے یا رب
کیا شہر عدم میں کوئی زنداں نہ ملے گا
مصحفیؔ جا کے گلستاں میں کرے کیا پیارے
کہ گلستاں ہے اسے خانۂِ زنداں تجھ بن

مومن خان مومن

صبر یا رب مری وحشت کا پڑے گا کہ نہیں
چارہ فرما بھی کبھی قیدی زنداں ہوں گے

یگانہ چنگیزی

عرصۂ قیدِ حیات اب وحشیوں پر تنگ ہے
چار دیوارِ عناصر مل کے زنداں ہو گئیں

قمر جلالوی

دیوانے شاد ہیں کہ وہ آئے ہیں دیکھنے
تقدیر کھل گئے درِ زنداں کے ساتھ ساتھ

مصطفی زیدی

سحر جیتے گی یا شامِ غریباں دیکھتے رہنا
یہ سر جھکتے ہیں یا دیوارِ زنداں دیکھتے رہنا

احسان دانش

اپنی پیغام نوائی کے نتائج میں مجھے
فکر زنداں تو رہا ہے غم زنداں نہ ہوا

اختر شیرانی

آزاد ہوں عالم سے تو آزاد ہوں غم سے
دنیا ہے ہمارے لیے زنداں کوئی دن اور

ضیا جالندھری

جب انہی کو نہ سنا پائے غمِ جاں اپنا
چپ لگی ایسی کہ خود ہو گئے زنداں اپنا
اونچی دیواروں سے باہر نکل آئے تو کھلا
ہم نے سینوں میں بنا رکھے ہیں زنداں بابا

جوش ملیح آبادی

دل آزادہ رو میں وہ تمنا تھی بیاباں کی
قدم رکھتے ہی شق ہونے لگی دیوار زنداں کی

حسرت موہانی

آنکھ جب بند ہوئی تب کھلیں آنکھیں اپنی
بزم یاراں جسے سمجھے تھے وہ زنداں نکلا

سید ضمیر جعفری

ہم اگر دشتِ جنوں میں نہ غزل خواں ہوتے
شہر ہوتے بھی تو آواز کے زنداں ہوتے

سیف الدین سیف

بڑے خطرے میں ہے حسن گلستاں ہم نہ کہتے تھے
چمن تک آ گئی دیوارِ زنداں ہم نہ کہتے تھے

سیماب اکبر آبادی

اس کے سوا بتائیں اسیری کا کیا سبب
گھبرائے انجمن سے تو زنداں میں آ گئے

شاد عظیم آبادی

مان لو پاؤں سے زنجیر بھی اتری لیکن
بھاگ کر جائے کہاں قیدی زنداں ان کا

عزیز حامد مدنی

یہ دنیا ہے تو کیا اے ہم نفس تفسیر غم کیجے
وہی آدابِ محفل بھی وہی آداب زنداں بھی

فانی بدایونی

کیوں نہ نیرنگ جنوں پر کوئی قرباں ہو جائے
گھر وہ صحرا کہ بہار آئے تو زنداں ہو جائے

احمد فراز

جس کو دیکھو وہی زنجیر بہ پا لگتا ہے
شہر کا شہر ہوا داخلِ زنداں جاناں

فراق گورکھپوری

سرِ شوریدہ دیا دشت و بیاباں بھی دیے
یہ مری خوبی قسمت کہ وہ زنداں ہو جائے
کیا ہے دیکھو حسرت سیر گلستاں کچھ نہیں
کچھ نہیں اے ساکنان کنجِ زنداں کچھ نہیں
کبھی پابندیوں سے چھٹ کے بھی دم گھلنے لگتا ہے
در و دیوار ہوں جس میں وہی زنداں نہیں ہوتا

قتیل شفائی

خوفِ محشر سے نہ گھبراؤ تم اے بادہ کشو
در توبہ بھی کھلا ہے درِ زنداں کی طرح

مجروح سلطان پوری

آیا ہے ہمارے ملک میں بھی اک دور زلیخائی یعنی
اب وہ غم زنداں دیتے ہیں جن کو غم زنداں ہونا تھا
فکر کیا انہیں جب تو ساتھ ہے اسیروں کے
اے غم اسیری تو خود شکست زنداں ہے
زنجیر و دیوار ہی دیکھی تم نے تو مجروحؔ مگر ہم
کوچہ کوچہ دیکھ رہے ہیں عالم زنداں تم سے زیادہ
آ ہی جائے گی سحر مطلع امکاں تو کھلا
نہ سہی بابِ قفس روزنِ زنداں تو کھلا