مرزا غالب

پھر بھر رہا ہوں خامۂِ مژگاں بہ خونِ دل
سازِ چمن طرازی داماں کیے ہوئے

حیدر علی آتش

ملتی ہو مانگنے سے باغ جہاں میں جو مراد
گل سے بلبل کے کفن کے لیے داماں مانگوں
آتا ہے سیر باغ کو وہ گوہر مراد
پھیلائے گل کے پاس جو داماں ہے ان دنوں

شیخ ابراہیم ذوق

کام یہ تیرا ہی تھا رحمت ہو اے ابرِ کرم
ورنہ جائے داغ عصیاں میرا داماں چھوڑ کر
جب چلا وہ مجھ کو بسمل خوں میں غلطاں چھوڑ کر
کیا ہی پچھتاتا تھا میں قاتل کا داماں چھوڑ کر

خواجہ میر درد

نہ تنہا کچھ یہی اطفال دشمن ہیں دوانوں کے
بھرے ہے کوہ بھی دیکھا تو یاں پتھروں سے داماں کو

اختر شیرانی

یوں تو ہر در پہ ہی کہتے نظر آئے دامن
کھینچتے ناز سے جس کو وہی داماں نہ ملا

ماجد صدیقی

کب تلک خوف ہوا سے آخر
ہو میسر، تہِ داماں ہونا

تلوک چند محروم

چھپا لیتے ہیں با دل مہر و مہ کو اپنے دامن میں
چراغِ داغِ الفت زیر داماں ہو نہیں سکتا

جوش ملیح آبادی

جب بشر کی دسترس سے دور ہے حبل المتیں
دشت وحشت میں پھر اک کافر کا داماں کیوں نہ ہو

سیماب اکبر آبادی

پھول گلشن کے نہیں تو خاک صحرا ہی سہی
کچھ نہ کچھ تو چاہیے تسکین داماں کے لیے
کیا ہو گا چار پھولوں سے اے موسمِ بہار
یہ تو ہمارے گوشۂ داماں میں آ گئے

شاد عظیم آبادی

اپنے مٹنے کا سبب میں بھی بتا دوں اے شوق
کاش چھو جائے مری خاک سے داماں ان کا
پہلے ہم نیت خالص سے وضو تو کر لیں
ٹھہر اے خاک ٹھہر پاک ہے داماں ان کا

شبلی نعمانی

کی ذرا دستِ جنوں نے کوتہی
چاک آ کر تا بہ داماں رہ گیا
حسن چمکا یار کا اب آفتاب
اک چراغ زیر داماں رہ گیا

شکیل بدایونی

پھولوں کو راس آیا نہ جب عرصۂ بہار
گلشن سے ہٹ کے گوشۂ داماں میں آ گئے

فانی بدایونی

دل آگاہ سے کیا کیا ہمیں امیدیں تھیں
وہ بھی قسمت سے چراغ تہِ داماں نکلا
اب جنوں سے بھی توقع نہیں آزادی کی
چاک داماں بھی باندازۂ داماں نکلا
قبر فانیؔ پر میں وہ برچیدہ دامن اے نسیم
منتشر کر خاک لیکن ان کا داماں دیکھ کر

فراق گورکھپوری

عشق کی مایوسیوں میں سوزِ پنہاں کچھ نہیں
اس ہوا میں یہ چراغ زیر داماں کچھ نہیں

ناصر کاظمی

حسن بھی حسن ہے محتاجِ نظر ہے جب تک
شعلۂ عشق چراغ تہِ داماں ہی سہی