مرزا غالب

گھر ہمارا جو نہ روتے بھی تو ویراں ہوتا
بحر گر بحر نہ ہوتا تو بیاباں ہوتا
گریہ چاہے ہے خرابی مرے کاشانے کی
در و دیوار سے ٹپکے ہے بیاباں ہونا
لرزتا ہے مرا دل زحمتِ مہرِ درخشاں پر
میں ہوں وہ قطرۂِ شبنم کہ ہو خار بیاباں پر
ہر قدم دوریِ منزل ہے نمایاں مجھ سے
میری رفتار سے بھاگے ہے ، بیاباں مجھ سے

امام بخش ناسخ

کسی خورشید رو کو جذبِ دل نے آج کھینچا ہے
کہ نور صبحِ صادق ہے غبار اپنے بیاباں کا
کسی سے دل نہ اس وحشت سرا میں میں نے اٹکایا
نہ الجھا خار سے دامن کبھی میرے بیاباں کا

حیدر علی آتش

وحش و طیور کو مری آہیں کریں ہلاک
آب و گیاہ کوہ و بیاباں سے دور ہوں
وحشتِ دل نے کیا ہے وہ بیاباں پیدا
سیکڑوں کوس نہیں صورت انساں پیدا

مصطفٰیٰ خان شیفتہ

وادیِ نجد کو دلی سے نہ دینا نسبت
ہے وہ مجنوں کا بیاباں، یہ بیاباں میرا

مومن خان مومن

سنگ اور ہاتھ وہی وہ ہی سر و داغ جنون
وہ ہی ہم ہوں گے وہی دشت و بیاباں ہوں گے

یگانہ چنگیزی

اے نسیمِ سحری ساتھ مرا کیا دے گی
باغ سے نکلا تو لاؤں گا بیاباں کی خبر

باقی صدیقی

نیند کانٹوں پہ بھی آ جاتی ہے
گھر کہاں تھا کہ بیاباں میں رہے

عبدالحمید عدم

کس نقشِ قدم پر ہے جھکا روزِ ازل سے
کس وہم میں سجدے سے بیاباں نہیں اٹھتا

قمر جلالوی

منزلیں غربت میں مجھ کو آفتِ جاں ہو گئیں
وسعتیں ایک ایک ذرے کی بیاباں ہو گئیں

عرفان صدیقی

پھر کچھ اس طرح پڑے حلقہ زنجیر میں پاؤں
سب جنوں بھول گئے دشت و بیاباں والے
اب یوں ہے کہ ہنگامۂ محفل میں ہیں خاموش
مشہور تھے جو ہوئے بیاباں کے لیے بھی
کون ایسی بستیوں سے گزرتا ہے روز روز
میرے کرشمہ ساز‘ بیاباں نہ کر مجھے

رئیس فروغؔ

رنج کا اپنا ایک جہاں ہے اور تو جس میں کچھ بھی نہیں
یا گہراؤ سمندر کا ہے یا پھیلاؤ بیاباں کا

بیان میرٹھی

سر شوریدہ پائے دشت پیما شام ہجراں تھا
کبھی گھر تھا بیاباں میں کبھی گھر میں بیاباں تھا

ضیا جالندھری

میرے ہر آدرش کا عالم اب تو عالم ویراں ہے
دل میں تیری تمنا جیسے موجِ ریگ بیاباں ہے
طلب اس کی ہے کہ جو سرحد امکاں میں نہیں
میری ہر راہ میں حائل ہے بیاباں اپنا
اپنے احوال پہ ہم آپ تھے حیراں بابا
آنکھ دریا تھی مگر دل تھا بیاباں بابا

ظہیر کاشمیری

کوئی دستک کوئی آہٹ نہ شناسا آواز
خاک اڑتی ہے درِ دل پہ بیاباں کی طرح

ماجد صدیقی

تھے کبھی ہم بھی گلستاں ماجدؔ
اب وتیرہ ہے بیاباں ہونا

تلوک چند محروم

اہلِ وحشت کا ٹھکانا بھی کہیں تو ہوتا
نہیں بے صرفہ بیاباں کا بیاباں ہونا

جوش ملیح آبادی

دل آزادہ رو میں وہ تمنا تھی بیاباں کی
قدم رکھتے ہی شق ہونے لگی دیوار زنداں کی

حفیظ ہوشیارپوری

عشق کی منزلِ اول پہ ٹھہرنے والو
اس سے آگے بھی کئی دشت و بیاباں ہوں گے

سید ضمیر جعفری

طوفاں نہیں گزرے کہ بیاباں نہیں گزرے
ہم مرحلۂ زیست سے آساں نہیں گزرے

سیماب اکبر آبادی

جوشِ بہار اور یہ بے اختیاریاں
سوئے چمن چلے تھے بیاباں میں آ گئے

شبلی نعمانی

دو قدم چل کر ترے وحشی کے ساتھ
جادۂ راہ بیاباں رہ گیا

شکیل بدایونی

ان کے بغیر ہم جو گلستاں میں آ گئے
محسوس یہ ہوا کہ بیاباں میں آ گئے

فانی بدایونی

خاک فانیؔ کی قسم ہے تجھے اے دشتِ جنوں
کس سے سیکھا ترے ذروں نے بیاباں ہونا
ذرہ وہ راز بیاباں ہے جو افشا نہ ہوا
دشتِ وحشت ہے وہ ذرہ جو بیاباں ہو جائے

قتیل شفائی

اور ہوں گے وہ میسر ہے جنہیں لطف بہار
ہم تو گلشن میں بھی رہتے ہیں بیاباں کی طرح

ناصر کاظمی

کیا خبر خاک ہی سے کوئی کرن پھوٹ پڑے
ذوق آوارگی دشت و بیاباں ہی سہی