مرزا غالب

حیف اس چار گرہ کپڑے کی قسمت غالب!
جس کی قسمت میں ہو عاشق کا گریباں ہونا
یک الف بیش نہیں صقیل آئینہ ہنوز
چاک کرتا ہوں میں جب سے کہ گریباں سمجھا
نہ لڑ ناصح سے ، غالب، کیا ہوا گر اس نے شدت کی
ہمارا بھی تو آخر زور چلتا ہے گریباں پر
بس کہ روکا میں نے اور سینے میں ابھریں پے بہ پے
میری آہیں بخیۂچاک گریباں ہو گئیں
یونہی افزائشِ وحشت کے جو ساماں ہوں گے
دل کے سب زخم بھی ہم شکلِ گریباں ہوں گے
ہوئی یہ کثرتِ غم سے تلف کیفیتِ شادی
کہ صبحِ عید مجھ کو بدتر از چاکِ گریباں ہے
پھر وضعِ احتیاط سے رکنے لگا ہے دم
برسوں ہوئے ہیں چاکِ گریباں کیے ہوئے

امام بخش ناسخ

مرا سینہ ہے مشرق آفتاب داغ ہجراں کا
طلوعِ صبح محشر چاک ہے میرے گریباں کا

حیدر علی آتش

دل شہید رہ دامان نہ ہوا تھا سو ہوا
ٹکڑے ٹکڑے جو گریباں نہ ہوا تھا سو ہوا
رونے پر میرے ہوا ہنس کے وہ گل شرمندہ
غنچہ ساں سر بہ گریباں نہ ہوا تھا سو ہوا
فصلِ بہار آئی ہے کپڑوں کو پھاڑیے
دل کے بخار دست و گریباں سے دور ہوں
یہ تنگ کر رہا ہے تو الجھا رہے ہیں وہ
دامن کے پاٹ پہلے گریباں سے دور ہوں
خار دامن سے الجھتے ہیں بہار آئی ہے
چاک کرنے کو کیا گل نے گریباں پیدا
دامن ہے اپنے ہاتھ میں اک رشکِ ماہ کا
پیشِ نظر ہلال گریباں ہے ان دنوں

شیخ ابراہیم ذوق

طفلِ اشک ایسا گرا دامان مژگاں چھوڑ کر
پھر نہ اٹھا کوچۂِ چاکِ گریباں چھوڑ کر

مصحفی غلام ہمدانی

معلوم نہیں مجھ کو کہ جاوے گا کدھر کو
یوں سینہ ترا چاکِ گریباں سے نکل کر
گزرا رگِ گردن سے کہ جوں شمعِ سر اپنا
تلوار ہی کھاتا ہے گریباں سے نکل کر
ناصح اسے سینا ہے تو اب سی لے وگرنہ
پھر فصلِ گل آئے یہ گریباں نہ ملے گا

مصطفٰیٰ خان شیفتہ

صبح ہوتے ہی گیا گھر مہِ تاباں میرا
پنجۂِ خور نے کیا چاکِ گریباں میرا
چارہ سازو! کوئی رہتا ہے بجز چاک ہوئے
آپ سو بار سییں، ہے یہ گریباں میرا
نہ سمجھا کسی نے مجھے گل نہ صبح
ہوا ٹکڑے ٹکڑے گریباں عبث

مومن خان مومن

چاک پردے سے یہ غمزے ہیں تو اے پردہ نشیں
ایک میں کیا کہ سبھی چاکِ گریباں ہوں گے
غش ہیں کہ بے دماغ ہیں گل پیرہن نمط
از بس دماغِ عطر گریباں نہیں رہا

فیض احمد فیض

دل کو صد لخت کیا سینے کو صد پارہ کیا
اور ہمیں چاکِ گریباں نہیں کرنے دیتے

یگانہ چنگیزی

دیتی ہے وحشتِ دل فصل بہاراں کی خبر
اب کہاں وحشیوں کو جیب و گریباں کی خبر
گل پریشانی سنبل پہ ہنسا کرتے ہیں
اور رکھتے نہیں خود چاکِ گریباں کی خبر

عبدالحمید عدم

کہتے تھے کہ ہے بار دو عالم بھی کوئی چیز
دیکھا ہے تو اب بار گریباں نہیں اٹھتا

قمر جلالوی

اے چمن والو! جنوں کی عظمت دیکھ لی
ان گلوں کو واقف چاکِ گریباں کر چلے
دو چار ٹان کے اور لگے ہاتھ بخیر گر
دامن بھی کچھ پھٹا ہے گریباں کے ساتھ ساتھ

مصطفیٰ زیدی

ہزاروں مہرباں اس راستے پر ساتھ آئیں گے
میاں یہ دل ہے یہ جیب و گریباں دیکھتے رہنا
طالب دستِ ہوس اور کئی دامن تھے
ہم سے ملتا جو نہ یوسف کے گریباں سے ملا

اختر شیرانی

سیرِ گل بھی ہے ہمیں باعث وحشت اخترؔ
ان کی الفت میں ہوئے چاکِ گریباں کیا کیا
چاک داماں کی قسم چاکِ گریباں کی قسم
ہنسنے والے تجھے اس حالِ پریشاں کی قسم

اسرار الحق مجاز

سب کا تو مداوا کر ڈالا اپنا ہی مداوا کر نہ سکے
سب کے تو گریباں سی ڈالے اپنا ہی گریباں بھول گئے
دستِ وحشت میں یہ اپنا ہی گریباں کب تک
ختم اب سلسلۂ چاکِ گریباں کر دیں

بہزاد لکھنوی

دستِ جنوں کی عقدہ کشائی تو دیکھیے
دامن کو بے نیاز گریباں بنا لیا
دامن کروں نہ چاک یہ ممکن تو ہے مگر
مضطر ہر ایک تارِ گریباں ہے کیا کروں

ظہیر کاشمیری

اب میں کس ناز پہ کہہ دوں کہ اسے کر لے قبول
دل تو صد چاک ہے مفلس کے گریباں کی طرح
اور بھی لوگ ہیں موجود بیابانوں میں
دستِ وحشت میں فقط میرا گریباں کیوں ہے
ہم خود ہی بے لباس رہے اس خیال سے
وحشت بڑھی تو سوئے گریباں بھی آئے گی

علی سردار جعفری

شعلۂ جاں کو ہوا دیتی ہے خود باد سموم
شعلۂ جاں کی طرح چاکِ گریباں چلیے

جوش ملیح آبادی

یوں سر نہ ہوگی جوشؔ کبھی عشق کی مہم
دل کو خرد سے دست و گریباں تو کیجئے
یاں جب آویزش ہی ٹھہری ہے تو ذرے چھوڑ کر
آدمی خورشید سے دست و گریباں کیوں نہ ہو
دامان گل رخاں کی اڑا دی ہیں دھجیاں
پھاڑا ہے ہم نے یوں بھی گریباں کبھی کبھی

سیماب اکبر آبادی

دھجیاں اڑنے کو اے سیمابؔ وسعت چاہیے
ہے کوئی میدان آشوب گریباں کے لیے
جاگ اور دیکھ ذرا عالم ویراں میرا
صبح کے بھیس میں نکلا ہے گریباں میرا
خود اٹھ کے ہاتھ میرے گریباں میں آ گئے
شاید قدم جنوں کے گلستاں میں آ گئے

شاد عظیم آبادی

چاک کرنے کا ہے الزام مرے سر ناحق
ہاتھ ان کے ہیں ہم ان کے ہیں گریباں ان کا
ان شہیدان محبت میں تو میں صاف کہوں
کوئی اتنا نہیں پکڑے جو گریباں ان کا

شبلی نعمانی

اے جنوں تجھ سے سمجھ لوں گا اگر
ایک بھی تارِ گریباں رہ گیا

شکیل بدایونی

آیا مری زباں پہ یکایک جو ان کا نام
کس کس کے ہاتھ میرے گریباں میں آ گئے

فانی بدایونی

جمع کرتا ہوں گریباں کے نکالے ہوئے تار
یاد آیا ہے مجھے سر بہ گریباں ہونا

احمد فراز

اب کے کچھ ایسی سجی محفل یاراں جاناں
سر بہ زانو ہے کوئی سر بہ گریباں جاناں

امیر مینائی

دستِ وحشت تو سلامت ہے ، رفو ہونے دو
ایک جھٹکے میں نہ دامن نہ گریباں ہو گا

فراق گورکھپوری

ہاتھ آئے تو وہی دامن جاناں ہو جائے
چھوٹ جائے تو وہی اپنا گریباں ہو جائے
ایک ہو جائے نہ جب تک سرحد ہوش و جنوں
ایک ہو کر چاک دامان و گریباں کچھ نہیں

قتیل شفائی

لاکھ پیوند امیدوں نے لگا رکھے ہیں
دل کی صورت نظر آتی ہے گریباں کی طرح

مجروح سلطان پوری

ہم کو جنوں کیا سکھلاتے ہو ہم تھے پریشاں تم سے زیادہ
چاک کیے ہیں ہم نے عزیزو چار گریباں تم سے زیادہ