امام بخش ناسخ

مرا سینہ ہے مشرق آفتاب داغ ہجراں کا
طلوعِ صبح محشر چاک ہے میرے گریباں کا

حیدر علی آتش

شمع گل ہووے جو صبح شبِ ہجراں مانگوں
اوس پڑنی بھی ہو موقوف جو یاراں مانگوں
سحر وصل کرے گی شبِ ہجراں پیدا
صلب کافر ہی سے ہوتا ہے مسلماں پیدا
موجد اس کی ہے سیہ روزی ہماری آتشؔ
ہم نہ ہونے تو نہ ہوتی شبِ ہجراں پیدا

شیخ ابراہیم ذوق

کچھ بخت سے میرے جو سوا ہے وہ سیاہی
باقی ہے تو میری شبِ ہجراں کے لیے ہے
کل گئے تھے تم جسے بیمارِ ہجراں چھوڑ کر
چل بسا وہ آج سب ہستی کا ساماں چھوڑ کر

مصحفی غلام ہمدانی

روز دشمن کا بھی اس طرح نہ کٹیو یارب
میں نے جس ظلم سے کاٹی شبِ ہجراں تجھ بن

مصطفٰی خان شیفتہ

کون کہتا ہے کہ ظلمت میں کم آتا ہے نظر
جو نہ دیکھا تھا سو ہم نے شبِ ہجراں دیکھا

مومن خان مومن

تو کہاں جائے گی کچھ اپنا ٹھکانا کر لے
ہم تو کل خوابِ عدم میں شبِ ہجراں ہوں گے
ناکامیوں کا گاہ گلہ گاہ شکر ہے
شوق وصال و اندہ ہجراں نہیں رہا

باقی صدیقی

قافلے صبح کے گزرے ہوں گے
ہم خیال شبِ ہجراں میں رہے

قمر جلالوی

کیا نہیں معلوم کون آیا عیادت کے لیے
اسی بند آنکھیں تری بیمارِ ہجراں ہو گئیں

عرفان صدیقی

میں بھی اک شامِ ملاقات کا مارا ہوا ہوں
مجھ سے کیا پوچھتے ہیں وادی ہجراں والے

اختر شیرانی

مر جائیں گے جب ہم تو بہت یاد کرے گی
جی بھر کے ستا لے شبِ ہجراں کوئی دن اور

بیان میرٹھی

سر شوریدہ پائے دشت پیما شام ہجراں تھا
کبھی گھر تھا بیاباں میں کبھی گھر میں بیاباں تھا

ظہیر کاشمیری

اے رہ نورد عشق سنبھل کر قدم بڑھا
اس راستے میں ظلمت ہجراں بھی آئے گی

حسرت موہانی

بتِ بے ‌ درد کا غم مونس ہجراں نکلا
درد جانا تھا جسے ہم نے وہ درماں نکلا

احمد فراز

ہم کہ روٹھی ہوئی رت کو بھی منا لیتے تھے
ہم نے دیکھا ہی نہ تھا موسم ہجراں جاناں

فراق گورکھپوری

عشق پھر عشق ہے جس روپ میں جس بھیس میں ہو
عشرت وصل بنے یا غم ہجراں ہو جائے

ناصر کاظمی

محرومِ خواب دیدۂ حیراں نہ تھا کبھی
تیرا یہ رنگ اے شبِ ہجراں نہ تھا کبھی
اے فلک بھیج کوئی برقِ خیال
کچھ تو شامِ شبِ ہجراں چمکے