مرزا غالب

دل دیا جان کے کیوں اس کو وفادار، اسدؔ
غلطی کی کہ جو کافر کو مسلماں سمجھا

حیدر علی آتش

خاک میں بھی جو ملوں میں تو کسی صحرا میں
تم سے مٹی بھی نہ اے گبر و مسلماں مانگوں
ہو گیا دیکھ کے قاضی بھی طرفدار اس کا
بے گنہ خون مسلماں نہ ہوا تھا سو ہوا
کوئی مردود خلائق نہیں مجھ سا آتشؔ
کیا کہوں کہتے ہیں ہندو و مسلماں کیا کیا
دل کی کدورتیں اگر انساں سے دور ہوں
سارے نفاق گبر و مسلماں سے دور ہوں
سحر وصل کرے گی شبِ ہجراں پیدا
صلب کافر ہی سے ہوتا ہے مسلماں پیدا
کافر ہو اے صنم جو خریدے نہ تو اسے
مہندی کے مول خون مسلماں ہے ان دنوں

داغ دہلوی

کرتے ہو داغؔ دور سے بت خانے کو سلام
اپنی طرح کے ایک مسلماں تمہیں تو ہو

شیخ ابراہیم ذوق

زلفیں تری کافر انہیں دل سے مرے کیا کام
دل کعبہ ہے اور کعبہ مسلماں کے لیے ہے

مصحفی غلام ہمدانی

یہ اس سے زیاں کار تو وہ اس سے بد آئیں
جاؤں میں کہاں گبر و مسلماں سے نکل کر
کہنے کو مسلماں ہیں سبھی کعبے میں لیکن
ڈھونڈوگے اگر ایک مسلماں نہ ملے گا
آ گیا بسکہ خلل مذہب و ملت میں مری
نہ رہا گبر میں پیارے نہ مسلماں تجھ بن

مومن خان مومن

عمر ساری تو کٹی عشقِ بتاں میں مومنؔ
آخری وقت میں کیا خاک مسلماں ہوں گے

فیض احمد فیض

ان کو اسلام کے لٹ جانے کا ڈر اتنا ہے
اب وہ کافر کو مسلماں نہیں کرنے دیتے

یگانہ چنگیزی

ڈھونڈتے پھرتے ہو اب ٹوٹے ہوئے دل میں پناہ
درد سے خالی دل گبر و مسلماں دیکھ کر

قمر جلالوی

ہیں یہ بت خانے میں بیٹھا کر رہا کیا قمر
ہم تو سنتے تھے تجھے ظالم مسلماں ہو گیا
گیسو ہیں ان کے عارضِ تاباں کے ساتھ ساتھ
کافر لگے ہوئے ہیں مسلماں کے ساتھ ساتھ

الطاف حسین حالی

تکفیر جو کہ کرتے ہیں ابنائے وقت کی
چھوڑے گا وقت انہیں نہ مسلماں کیے بغیر

احسان دانش

دل کی آواز ہو محروم اثر کیا معنی
عشق کافر ہے اگر حسن مسلماں نہ ہوا

حفیظ جالندھری

ہے بت کدے میں بھی اسے ایمان کا خیال
کیوں اعتبار مرد مسلماں نہ کیجیے
سنگ دل سمجھا برہمن شیخ سمجھے حد مذاق
ہنس پڑے دونوں مجھے اب تک مسلماں دیکھ کر

شاد عظیم آبادی

جستجو کے لیے نکلے گا جو خواہاں ان کا
گھر بتا دے گا کوئی مرد مسلماں ان کا

فانی بدایونی

عشق وہ کفر کہ ایمان ہے دل والوں کا
عقل مجبور وہ کافر جو مسلماں ہو جائے