خونِ جگر سے دعوتِ مژگاں نہ کیجیے
حفیظ جالندھری
ان گیسوؤں میں شانۂ ارماں نہ کیجیے
خونِ جگر سے دعوتِ مژگاں نہ کیجیے
مر جائیے نہ کیجیے ذکر بہشت و حور
اب خواب کو بھی خواب پریشاں نہ کیجیے
باقی ہو جو بھی حشر یہیں پر اٹھائیے
مرنے کے بعد زیست کا ساماں نہ کیجیے
دوزخ کو دیجیے نہ پراگندگی مری
شیرازۂ بہشت پریشاں نہ کیجیے
شاید یہی جہاں کسی مجنوں کا گھر بنے
ویرانہ بھی اگر ہے تو ویراں نہ کیجیے
کیا ناخدا بغیر کوئی ڈوبتا نہیں
مجھ کو مرے خدا سے پشیماں نہ کیجیے
ہے بت کدے میں بھی اسے ایمان کا خیال
کیوں اعتبار مرد مسلماں نہ کیجیے
ہم سے یہ بار لطف اٹھایا نہ جائے گا
احساں یہ کیجیے کہ یہ احساں نہ کیجیے
آئینہ دیکھیے مری صورت نہ دیکھیے
میں آئینہ نہیں مجھے حیراں نہ کیجیے
تو ہی عزیز خاطر احباب ہے حفیظؔ
کیا کیجیے اگر تجھے قرباں نہ کیجیے