مرزا غالب

شوخی رنگِ حنا خونِ وفا سے کب تک
آخر اے عہد شکن! تو بھی پشیماں نکلا
کی مرے قتل کے بعد اس نے جفا سے توبہ
ہائے اس زود پشیماں کا پشیماں ہونا
وجہ مایوسی عاشق ہے تغافل ان کا
نہ کبھی قتل کریں گے ، نہ پشیماں ہوں گے

حیدر علی آتش

قتل کر کے مجھے تلوار کو توڑا اس نے
خونِ ناحق سے پشیماں نہ ہوا تھا سو ہوا
دوست نے جب نہ دمِ ذبح سسکتا چھوڑا
میرے دشمن ہوئے ہنس ہنس کے پشیماں کیا کیا

داغ دہلوی

محشر میں وہ نادم ہوں خدا یہ نہ دکھائے
آنکھوں نے کبھی اس کو پشیماں نہیں دیکھا
آتا ہے بعد ظلم تمہیں کو تو رحم بھی
اپنے کیے سے دل میں پشیماں تمہیں تو ہو

مصطفٰی خان شیفتہ

میں نے کیا جانیے کس ذوق سے دی جاں دمِ قتل
کہ بہت اس سے ستم گر کو پشیماں دیکھا

مومن خان مومن

کر کے زخمی مجھے نادم ہوں یہ ممکن ہی نہیں
گر وہ ہوں گے بھی تو بے وقت پشیماں ہوں گے

یگانہ چنگیزی

کیا عجب ہے بھول جائیں اہلِ دل اپنا بھی درد
حسن مستانہ کو آخر میں پشیماں دیکھ کر

قمر جلالوی

دل میں ہم شرما رہے ہیں شکوۂ محشر کے بعد
پیشِ حق کیوں آئے کیوں ان کو پشیماں کر چلے

اختر شیرانی

ہے کرم ان کے ستم کا کہ کرم بھی ہے ستم
شکوے سن سن کے وہ ہوتے ہیں پشیماں کیا کیا
لعنت تھی گناہوں کی ندامت مرے حق میں
ہے شکر کہ اس سے ہیں پشیماں کوئی دن اور
بس کرو او میری رونے والی آنکھوں بس کرو
اب تو اپنے ظلم پر وہ بھی پشیماں ہو گئیں

جوش ملیح آبادی

اس ناز ہوش کو کہ ہے موسیٰ پہ طعنہ زن
اک دن نقاب الٹ کے پشیماں تو کیجئے

حفیظ جالندھری

کیا ناخدا بغیر کوئی ڈوبتا نہیں
مجھ کو مرے خدا سے پشیماں نہ کیجیے
شکوہ فرماتے ہی الٹی منتیں کرنی پڑیں
دل پشیماں ہو گیا ان کو پشیماں دیکھ کر

حفیظ ہوشیارپوری

کس قدر سخت ہے یہ ترک و طلب کی منزل
اب کبھی ان سے ملے بھی تو پشیماں ہوں گے
جب کبھی ہم نے کیا عشق پشیمان ہوئے
زندگی ہے تو ابھی اور پشیماں ہوں گے

شکیل بدایونی

تشہیر دل گرفتگی حسن ہو گئی
آنسو چھلک کے چشم پشیماں میں آ گئے
ذوق گناہ و عزم پشیماں لیے ہوئے
کیا کیا ہنر ہیں حضرت انساں لیے ہوئے

فانی بدایونی

دے ترا حسن تغافل جسے ہے چاہے فریب
ورنہ تو اور جفاؤں پہ پشیماں ہونا
موت وہ دن بھی دکھائے مجھے جس دن فانیؔ
زندگی اپنی جفاؤں پہ پشیماں ہو جائے

امیر مینائی

اپنے مرنے کا تو کچھ غم نہیں، یہ غم ہے ، امیر
چارہ گر مفت میں بیچارہ پشیماں ہو گا

شاذ تمکنت

دستِ طلب کب میں نے بڑھایا کچھ نہ ملا تو شکوہ کیا
کیوں میرے دامان تہی پر اتنے پشیماں آپ ہوئے

فراق گورکھپوری

پاک بازان محبت میں جو بے باکی ہے
حسن گر اس کو سمجھ لے تو پشیماں ہو جائے
کچھ مداوا بھی ہو مجروح دلوں کا اے دوست
مرہم زخم ترا جور‌ پشیماں ہو جائے

قابل اجمیری

جن کو فریب شوق میں آنا تھا آ چکے
اب تو ترے کرم کو پشیماں کریں گے ہم

مجروح سلطان پوری

عہدِ وفا یاروں سے نبھائیں ناز حریفاں ہنس کے اٹھائیں
جب ہمیں ارماں تم سے سوا تھا اب ہیں پشیماں تم سے زیادہ

ناصر کاظمی

حاصلِ عشق ترا حسن پشیماں ہی سہی
میری حسرت تری صورت سے نمایاں ہی سہی