مرزا غالب

سرمۂِ مفتِ نظر ہوں مری قیمت یہ ہے
کہ رہے چشمِ خریدار پہ احساں میرا
صد جلوہ رو بہ رو ہے جو مژگاں اٹھائیے
طاقت کہاں کہ دید کا احساں اٹھائیے
دیوار بارِ منتِ مزدور سے ہے خم
اے خانماں خراب نہ احساں اٹھائیے

حیدر علی آتش

میں نے رنگیں نہ کیا اس کا تڑپ کر دامن
سر جلاد پہ احساں نہ ہوا تھا سو ہوا
چشمِ بینا بھی عطا کی دل آگہ بھی دیا
میرے اللہ نے مجھ پر کیے احساں کیا کیا

مومن خان مومن

منت حضرت عیسیٰ نہ اٹھائیں گے کبھی
زندگی کے لیے شرمندۂِ احساں ہوں گے
بے تودہ تودہ خاک سبک دوش ہو گئے
سر پر جنونِ عشق کا احساں نہیں رہا

اختر شیرانی

ہستی کبھی قدرت کا اک احسان تھی ہم پر
اب ہم پہ ہے قدرت کا یہ احساں کوئی دن اور

بہزاد لکھنوی

مجھ کو خبر نہیں مرے دل کو خبر نہیں
کس کی نظر نے بندۂ احساں بنا لیا

حفیظ جالندھری

ہم سے یہ بار لطف اٹھایا نہ جائے گا
احساں یہ کیجیے کہ یہ احساں نہ کیجیے

شاد عظیم آبادی

شادؔ گھبرا گیا اک عمر سے جیتے جیتے
وہ بلا لیں مجھے اس وقت تو احساں ان کا

شبلی نعمانی

تیر قاتل کا یہ احساں رہ گیا
جائے دل سینہ میں پیکاں رہ گیا
قتل ہو کر بھی سبکدوشی کہاں
تیغ کا گردن پہ احساں رہ گیا

فانی بدایونی

بے اجل کام نہ اپنا کسی عنواں نکلا
دم تو نکلا مگر آزردۂ احساں نکلا

احمد فراز

زندگی تیری عطا تھی سو ترے نام کی ہے
ہم نے جیسے بھی بسر کی ترا احساں جاناں