مرزا غالب

تنگی دل کا گلہ کیا؟ یہ وہ کافر دل ہے
کہ اگر تنگ نہ ہوتا تو پریشاں ہوتا
نظر میں ہے ہماری جادۂِ راہِ فنا غالب
کہ یہ شیرازہ ہے عالم کے اجزائے پریشاں کا
بوئے گل، نالۂِ دل، دودِ چراغ محفل
جو تری بزم سے نکلا، سو پریشاں نکلا
نیند اس کی ہے ، دماغ اس کا ہے ، راتیں اس کی ہیں
تیری زلفیں جس کے بازو پر پریشاں ہو گئیں
شوقِ دیدار میں ، گر تو مجھے گردن مارے
ہو نگہ ، مثلِ گل شمع ، پریشاں مجھ سے
منتشر ہو کے بھی دل جمع رکھیں گے یعنی
ہم بھی اب پیروئے گیسوئے پریشاں ہوں گے
غنچہ تا شگفتن ہا برگِ عافیت معلوم
باوجودِ دل جمعی خوابِ گل پریشاں ہے
مانگے ہے پھر کسی کو لبِ بام پر ہوس
زلفِ سیاہ رخ پہ پریشاں کیے ہوئے

حیدر علی آتش

دے دیا کیجیے سودائی تمہارا ہوں میاں
سونگھنے کو جو کبھی زلفِ پریشاں مانگوں
ہر زباں پر مری رسوائی کا افسانہ ہے
نسخۂِ شوق پریشاں نہ ہوا تھا سو ہوا
آنکھیں گیسو کے تصور میں رہا کرتی ہیں بند
لطف دکھلاتا ہے یہ خواب پریشاں کیا کیا

شیخ ابراہیم ذوق

دیکھیے کیا ہو کہ ہے اب جان کے پیچھے پڑی
دل کو اے کافر تری زلفِ پریشاں چھوڑ کر

مصحفی غلام ہمدانی

دل خوش نہ ہوا زلفِ پریشاں سے نکل کر
پچھتائے ہم اس شامِ غریباں سے نکل کر

مصطفٰی خان شیفتہ

شیفتہ زلفِ پری رو کا پڑا سایہ کہیں
میں نے جب آپ کو دیکھا تو پریشاں دیکھا

مومن خان مومن

ہم نکالیں گے سن اے موجِ ہوا بل تیرا
اس کی زلفوں کے اگر بال پریشاں ہوں گے
نیند آئی ہے فسانۂِ گیسو و زلف سے
وہم و گمان خواب پریشاں نہیں رہا

یگانہ چنگیزی

کیسی کیسی بستیاں دو دن میں ویراں ہو گئیں
دیکھتے ہی دیکھتے گرد پریشاں ہو گئیں
شغلِ مے کب تک یہ ساقی آنکھیں جھک آئیں بہت
رات بھیگی اور زلفیں بھی پریشاں ہو گئیں
پھرتی ہیں آنکھوں میں ساقی شب کی وہ کیفیتیں
دیکھتے ہی دیکھتے خواب پریشاں ہو گئیں
راس آئی ہے نہ آئے گی زمانے کی ہوا
یاسؔ کیا کیا صحبتیں گرد پریشاں ہو گئیں
پیرہن میں کیا سما سکتا حباب جاں بلب
ہستی موہوم کا خواب پریشاں دیکھ کر

جون ایلیا

دل پریشاں ہے کیا کیا جائے
عقلِ حیراں ہے کیا کیا جائے

قمر جلالوی

کیا خبر تھی یہ بلائیں سامنے آ جائیں گی
میری شامت مائل زلفِ پریشاں ہو گیا
اپنی زلفیں کیوں سرِ بالیں پریشاں کر چلے
آپ تو بالکل مرے مرنے کا ساماں کر چلے

عرفان صدیقی

جب وہم ہے وہ شکل تو حیراں نہ کر مجھے
اے چشمِ اعتبار پریشاں نہ کر مجھے

احسان دانش

ذرے ذرے سے یہ اعلان پریشانی ہے
مطمئن خاک وہ ہو گا جو پریشاں نہ ہوا
عشق ہر چند مصائب سے پریشاں نہ ہوا
نہ ہوا حسن مگر تابع فرماں نہ ہوا
لاکھ دنیا نے یہ چاہا کہ پریشاں ہو مگر
میں ترے غم کی حفاظت میں پریشاں نہ ہوا

اختر شیرانی

آرزو وصل کی رکھتی ہے پریشاں کیا کیا
کیا بتاؤں کہ مرے دل میں ہیں ارماں کیا کیا
غم خانۂ ہستی میں ہے مہماں کوئی دن اور
کر لے ہمیں تقدیر پریشاں کوئی دن اور
آؤ بے پردہ تمہیں جلوۂ پنہاں کی قسم
ہم نہ چھیڑیں گے ہمیں زلفِ پریشاں کی قسم
چاک داماں کی قسم چاکِ گریباں کی قسم
ہنسنے والے تجھے اس حالِ پریشاں کی قسم
عمر بھر کی تلخ بیداری کا ساماں ہو گئیں
ہائے وہ راتیں کہ جو خواب پریشاں ہو گئیں
آہ وہ دن جو نہ آئے پھر گزر جانے کے بعد
ہائے وہ راتیں کہ جو خواب پریشاں ہو گئیں
عمر بھر کم بخت کو پھر نیند آ سکتی نہیں
جس کی آنکھوں پر تری زلفیں پریشاں ہو گئیں
کچھ تجھے بھی ہے خبر او سونے والے ناز سے
میری راتیں لٹ گئیں نیندیں پریشاں ہو گئیں
گلشن دل میں کہاں اخترؔ وہ رنگ نو بہار
آرزوئیں چند کلیاں تھیں پریشاں ہو گئیں

بہزاد لکھنوی

محسوس کر کے ہم نے محبت کا ہر الم
خواب سبک کو خواب پریشاں بنا لیا
اک بے وفا پہ کر کے تصدق دل و جگر
بہزادؔ ہم نے خود کو پریشاں بنا لیا
ہر طرح کا سکون ہے ہر طرح کا ہے کیف
پھر بھی یہ میرا قلب پریشاں ہے کیا کروں

بیان میرٹھی

مری ہستی کی محشر میں کوئی تعبیر کیا کرتا
کسی زلف پریشاں کا میں اک خواب پریشاں تھا

زہرا نگاہ

نہ جانے کتنے ستارے یہ کہتے ڈوب گئے
سحر کا رنگ پریشاں ہے دیکھیے کیا ہو

ماجد صدیقی

کتنا مشکل ہے ترے غم کا حصول
کتنا مشکل ہے پریشاں ہونا
پھولنا شاخ پہ غنچہ غنچہ
اور اک ساتھ پریشاں ہونا

تلوک چند محروم

اسیر حلقۂ گیسوئے خوباں ہو نہیں سکتا
وہ دل تو جس کو تسکیں دے پریشاں ہو نہیں سکتا
برگ ہائے گلِ تر کا یہ پریشاں ہونا
جرم ہے گل کدۂ دہر میں خنداں ہونا
جب کسی غنچے کو کھلتے ہوئے دیکھا میں نے
آ گیا یاد وہیں دل کا پریشاں ہونا

جوش ملیح آبادی

یہ عالم کیا ہے اک مجموعہ ہے ناچیز ذروں کا
یہ دنیا کیا ہے اک ترکیب اجزائے پریشاں کی
ہواؤں کے وہ جھونکے وہ کھلے میدان کی سردی
وہ لہریں چاند سے رخسار پر زلف پریشاں کی
کافر بنوں گا کفر کا ساماں تو کیجئے
پہلے گھنیری زلف پریشاں تو کیجئے
ایک ہے جب شور جہل و بانگ حکمت کا مآل
دل ہلاک ذوق گلبانگ پریشاں کیوں نہ ہو
اک نہ اک ظلمت سے جب وابستہ رہنا ہے تو جوشؔ
زندگی پر سایۂ زلف پریشاں کیوں نہ ہو
اس وقت بھی کہ خاطر مجموعہ تھی نصیب
کم بخت دل ہوا ہے پریشاں کبھی کبھی

حفیظ جالندھری

مر جائیے نہ کیجیے ذکر بہشت و حور
اب خواب کو بھی خواب پریشاں نہ کیجیے
دوزخ کو دیجیے نہ پراگندگی مری
شیرازۂ بہشت پریشاں نہ کیجیے

سید ضمیر جعفری

حیران تو گزرے ہیں زمانے کی روش سے
یہ اپنی روش تھی کہ پریشاں نہیں گزرے
عشق ہی شعلۂ امکان سحر ہے ورنہ
خواب تعبیر سے پہلے ہی پریشاں ہوتے

سلام مچھلی شہری

میں تو کہتا ہوں تمہی درد کے درماں ہو ضرور
اور وہ کہتے ہیں کہ تم آج پریشاں ہو ضرور

شاد عظیم آبادی

جن کی آغوش تصور میں ہے وہ حور جمال
کہیں سچ ہو نہ یہی خواب پریشاں ان کا
جو اس الجھاؤ کے خود ہیں متمنی دل سے
کیا بگاڑے گی تری زلفِ پریشاں ان کا

عزیز حامد مدنی

کمال‌ جانثاری ہو گئی ہے خاکِ پروانہ
اسے اکسیر بھی کہتے ہیں اور خاک پریشاں بھی
کچھ اب کے ہم بھی کہیں اس کی داستان وصال
مگر وہ زلفِ پریشاں کھلے تو بات چلے

فانی بدایونی

راحت انجام غم اور راحت دنیا معلوم
لکھ دیا دل کے مقدر میں پریشاں ہونا
شکوہ منظور نہیں تذکرۂ عشق نہ چھیڑ
کہ وہ درپردہ مرا حالِ پریشاں نکلا

احمد فراز

ہوش آیا تو سبھی خواب تھے ریزہ ریزہ
جیسے اڑتے ہوئے اوراق پریشاں جاناں

فراق گورکھپوری

یہ بھی سچ ہے کوئی الفت میں پریشاں کیوں ہو
یہ بھی سچ ہے کوئی کیوں کر نہ پریشاں ہو جائے
عشق کی ہے خود نمائی عشق کی آشفتگی
روئے تاباں کچھ نہیں زلفِ پریشاں کچھ نہیں
یاد آ ہی جاتی ہے اکثر دلِ برباد کی
یوں تو سچ ہے چند ذرات پریشاں کچھ نہیں
کاش اپنے درد سے بیتاب ہوتے اے فراقؔ
دوسرے کے ہاتھوں یہ حالِ پریشاں کچھ نہیں

مجروح سلطان پوری

وہ جس کے گداز محنت سے پر نور شبستاں ہے تیرا
اے شوخ اسی بازو پہ تری زلفوں کو پریشاں ہونا تھا
یہ نیاز غم خواری یہ شکستِ دل داری
بس نوازش جاناں دل بہت پریشاں ہے
ہم کو جنوں کیا سکھلاتے ہو ہم تھے پریشاں تم سے زیادہ
چاک کیے ہیں ہم نے عزیزو چار گریباں تم سے زیادہ

ناصر کاظمی

پرساں نہ تھا کوئی تو یہ رسوائیاں نہ تھیں
ظاہر کسی پہ حالِ پریشاں نہ تھا کبھی