مرزا غالب

یونہی افزائشِ وحشت کے جو ساماں ہوں گے
دل کے سب زخم بھی ہم شکلِ گریباں ہوں گے
کار گاہ ہستی میں لالہ داغ ساماں ہے
برقِ خرمن راحت، خونِ گرم دہقاں ہے
باہم دگر ہوئے ہیں دل و دیدہ پھر رقیب
نظارہ و خیال کا ساماں کیے ہوئے
دوڑے ہے پھر ہر ایک گل و لالہ پر خیال
صد گلستاں نگاہ کا ساماں کیے ہوئے

حیدر علی آتش

دوست دشمن نے کیے قتل کے ساماں کیا کیا
جان مشتاق کے پیدا ہوئے خواہاں کیا کیا

شیخ ابراہیم ذوق

کل گئے تھے تم جسے بیمارِ ہجراں چھوڑ کر
چل بسا وہ آج سب ہستی کا ساماں چھوڑ کر

مصحفی غلام ہمدانی

ہونے کی نہیں تیری خوشی سرو خراماں
تا خاک میں یہ بے سر و ساماں نہ ملے گا

مصطفٰی خان شیفتہ

کفایت تھی مجھ کو تو چینِ جبیں
کیا قتل کا اور ساماں عبث

مومن خان مومن

دفن جب خاک میں ہم سوختہ ساماں ہوں گے
فلس ماہی کے گل شمع شبستاں ہوں گے
کس کام کے رہے جو کسی سے رہا نہ کام
سر ہے مگر غرور کا ساماں نہیں رہا

یگانہ چنگیزی

آپ میں کیونکر رہے کوئی یہ ساماں دیکھ کر
شمع عصمت کو بھری محفل میں عریاں دیکھ کر

باقی صدیقی

مرنا ہے تو نظر رکھیں اپنے مال پر
جینا ہے تو حیات کا ساماں خریدیے

عبدالحمید عدم

وہ مرمر کی طرح شفاف اور ہنستے ہوئے اعضا
حیاتِ جاؤداں کے ساز و ساماں یاد آتے ہیں

قمر جلالوی

کیا کروں جو آہیں رسوائی کا ساماں ہو گئیں
مشکلیں ایسی مجھے کیوں دیں جو آساں ہو گئیں
اپنی زلفیں کیوں سرِ بالیں پریشاں کر چلے
آپ تو بالکل مرے مرنے کا ساماں کر چلے

مجید امجد

عشق کی ٹیسیں جو مضراب رگِ جاں ہو گئیں
روح کی مدہوش بیداری کا ساماں ہو گئیں
پیار کی میٹھی نظرسے تو نے جب دیکھا مجھے
تلخیاں سب زندگی کی لطف ساماں ہو گئیں

اختر شیرانی

عمر بھر کی تلخ بیداری کا ساماں ہو گئیں
ہائے وہ راتیں کہ جو خواب پریشاں ہو گئیں
دل مہجور کو تسکین کا ساماں نہ ملا
شہرِ جاناں میں ہمیں مسکن جاناں نہ ملا

بیان میرٹھی

ترے کشتے کو محشر خواب آسائش کا ساماں تھا
کہ صور افسانہ گو تھا زلزلہ گہوارۂ جنباں تھا