مرزا غالب

وائے دیوانگی شوق کہ ہر دم مجھ کو
آپ جانا ادھر اور آپ ہی حیراں ہونا
بد گمانی نے نہ چاہا اسے سرگرمِ خرام
رخ پہ ہر قطرہ عرق دیدۂِ حیراں سمجھا
گردشِ ساغرِ صد جلوۂِ رنگیں ، تجھ سے
آئینہ داری یک دیدۂِ حیراں ، مجھ سے

حیدر علی آتش

روئے دلبر کی صفا سے تھا بڑا ہی دعویٰ
سامنے ہو کے ہوا آئنہ حیراں کیا کیا
کچھ کہے کوئی میں منہ دیکھ کے رہ جاتا ہوں
کم دماغی نے کیا ہے مجھے حیراں کیا کیا
مستی کا ان لبوں کے فسانہ کہاں نہیں
مجلس نہیں وہ جو نہیں حیراں ہے ان دنوں

مصحفی غلام ہمدانی

صورت کے تری سامنے رہ جائے ہے کیسے
ہر بت کی نگہ دیدۂ حیراں سے نکل کر

مومن خان مومن

تابِ نظارہ نہیں آئنہ کیا دیکھنے دوں
اور بن جائیں گے تصویر جو حیراں ہوں گے
ہر لحظہ مہر جلووں سے ہیں چشم پوشیاں
آئینہ زار دیدۂ حیراں نہیں رہا

یگانہ چنگیزی

طاقت مجنوں کجا نظارۂ لیلی کجا
پردۂ محمل اٹھا اور آنکھیں حیراں ہو گئیں
امتیاز صورت و معنی سے بیگانہ ہوا
آئنے کو آئنہ حیراں کو حیراں دیکھ کر

باقی صدیقی

رنگ دنیا پہ نظر رکھتے تھے
عمر بھر دیدۂ حیراں میں رہے
شام و سحر کے رنگ نمایاں نہیں رہے
یا ہم شریک دیدہِ حیراں نہیں رہے
یوں بھی نہ کھل سکا نہ کوئی زندگی کا راز
دل دک کے کیوں نہ دیدہِ حیراں خریدیے

جون ایلیا

دل پریشاں ہے کیا کیا جائے
عقلِ حیراں ہے کیا کیا جائے

خواجہ میر درد

ملاؤں کس کی آنکھوں سے میں اپنی چشمِ حیراں کو
عیاں جب ہر جگہ دیکھوں اسی کے ناز پنہاں کو

عرفان صدیقی

رات پھر جمع ہوئے شہر گریزاں والے
وہی چہرے تھے مرے دیدہِ حیراں والے
جب وہم ہے وہ شکل تو حیراں نہ کر مجھے
اے چشمِ اعتبار پریشاں نہ کر مجھے

مصطفی زیدی

سمجھ میں آ گیا تیری نگاہوں کے الجھنے پر
بھری محفل میں سب کا ہم کو حیراں دیکھتے رہنا

اختر شیرانی

تربت وہ جگہ ہے کہ جہاں غم ہے نہ حیرت
حیرت کدۂ غم میں ہیں حیراں کوئی دن اور

بہزاد لکھنوی

آئینہ دیکھنے کی ضرورت نہ تھی کوئی
اپنے کو خود ہی آپ نے حیراں بنا لیا
باہوش ہوں مگر مرا دامن ہے چاک چاک
عالم یہ دیکھ دیکھ کے حیراں ہے کیا کروں

ضیا جالندھری

اپنے احوال پہ ہم آپ تھے حیراں بابا
آنکھ دریا تھی مگر دل تھا بیاباں بابا

ظہیر کاشمیری

میں تری بزم سے نکلا تھا نظر کی کی صورت
اب نہ یوں دیکھ مجھے دیدۂ حیراں کی طرح

حسرت موہانی

آئنہ پیکرِ تصویر نگاہ مشتاق
جسے دیکھا تری محفل میں وہ حیراں نکلا

حفیظ جالندھری

آئینہ دیکھیے مری صورت نہ دیکھیے
میں آئینہ نہیں مجھے حیراں نہ کیجیے

شاد عظیم آبادی

کیجیے شانہ و آئینہ کی حالت پہ نگاہ
سینہ صدچاک کوئی ہے کوئی حیراں ان کا

عزیز حامد مدنی

حرم کا آئینہ برسوں سے دھندلا بھی ہے حیراں بھی
اک افسون برہمن ہے کہ پیدا بھی ہے پنہاں بھی
کبھی اک لو سے ششدر ہے کبھی اک ضو سے حیراں ہے
زمیں کس انکشاف‌ نار سے یا رب پگھلتی ہے

فانی بدایونی

دل بس اک لرزش پیہم ہے سراپا یعنی
تیرے آئینہ کو آتا نہیں حیراں ہونا
شوق بیتاب کا انجام تحیر پایا
دل سمجھتے تھے جسے دیدۂ حیراں نکلا
جوہر آئینہ دل ہے وہ تصویر ہے تو
دل وہ آئینہ کہ تو دیکھ کے حیراں ہو جائے

اختر ہوشیارپوری

میں اس کو دیکھتا تھا دم بخود تھا حیراں تھا
کسے خبر وہ کڑا وقت کتنا بھاری تھا

امیر مینائی

رو برو آئینے کے ، تو جو مری جاں ہو گا
آئینہ ایک طرف، عکس بھی حیراں ہو گا

شاذ تمکنت

خاکِ دشتِ وفا تھی رخ پر ورنہ کوئی بات نہ تھی
آئنہ اپنا دھندلا پا کر کتنے حیراں آپ ہوئے

ناصر کاظمی

محرومِ خواب دیدۂ حیراں نہ تھا کبھی
تیرا یہ رنگ اے شبِ ہجراں نہ تھا کبھی