مرزا غالب

بیاں کیا کیجیے بیدادکاوش ہائے مژگاں کا
کہ ہر یک قطرہء خوں دانہ ہے تسبیحِ مرجاں کا
نہیں معلوم ، کس کس کا لہو پانی ہوا ہو گا
قیامت ہے سرشک آلودہ ہونا تیری مژگاں کا
جلوہ از بسکہ تقاضائے نگہ کرتا ہے
جوہر آئینہ بھی چاہے ہے مژگاں ہونا
وہ نگاہیں کیوں ہوئی جاتی ہیں یارب دل کے پار؟
جو مری کوتاہی قسمت سے مژگاں ہو گئیں
درسِ عنوانِ تماشا ، بہ تغافلِ خوشتر
ہے نگہ رشتۂِ شیرازۂِ مژگاں مجھ سے
کرتا ہوں جمع پھر جگرِ لخت لخت کو
عرصہ ہوا ہے دعوتِ مژگاں کیے ہوئے
چاہے ہے پھر کسی کو مقابل میں آرزو
سرمے سے تیز دشنۂِ مژگاں کیے ہوئے
صد جلوہ رو بہ رو ہے جو مژگاں اٹھائیے
طاقت کہاں کہ دید کا احساں اٹھائیے

شیخ ابراہیم ذوق

چنگل میں ہے موذی کے دل اس چشم کے ہاتھوں
گھیرا یہ غضب پنجۂِ مژگاں کے لیے ہے
طفلِ اشک ایسا گرا دامان مژگاں چھوڑ کر
پھر نہ اٹھا کوچۂِ چاکِ گریباں چھوڑ کر

مصحفی غلام ہمدانی

نا زوری میں آیا نہ کبھو تا سرِ مژگاں
یک قطرۂِ خوں بھی بن مژگاں سے نکل کر

مومن خان مومن

کرتے ہیں اپنے زخمِ جگر کو رفوِ ہم آپ
کچھ بھی خیال جنبشِ مژگاں نہیں رہا

عبدالحمید عدم

وہ ابرو یاد آتے ہیں وہ مژگاں یاد آتے ہیں
نہ پوچھو کیسے کیسے تیر و پیکاں یاد آتے ہیں